怕痛淆底獸專用 #冗長實用文

📜病程簡介：話說本人兩年嚟都有腸胃問題，成日有胃氣經常深夜打嗝，食某啲食物會胃痛，長期右下腹痛/有啲嘢嘅感覺，有啲擔心係胃潰瘍。上年2月因腸胃急痛以為盲腸炎入咗急症室，照CT scan＋驗血＋驗尿後，證明唔係盲腸炎。及後急症生醫生建議搵腸胃科做endoscopy(內窺鏡檢查/胃鏡)。最後喺2021年3月尾進行了endoscopy＋colonoscopy，發現只係gastritis(胃炎)。

⭐️Step 1 見腸胃科醫生 - 地點：腸胃中心診所 - 活動：面談為主，只有檢查血壓、體重、身高。 - 費用：90USD 喺網上面搵咗個非常好評價同保險in network嘅腸胃科醫生。醫生聽完病徵之後，亦都詳細講解返當日急症室張CT Scan。醫生話CT scan可以見到大問題，所以減除咗卵巢生嘢/腎生石嘅估計。然後醫生用手去按不同部份檢查腹腔，認為位置非膽部問題。最後決定安排照上下，做endoscopy＋colonoscopy(結腸鏡檢查/腸鏡)。

然後跟姑娘預約做鏡時間及地點。因為保險in network嘅唔包括醫生去開嘅做鏡中心，最後要Book醫院。亦因為醫院嘅關係，可能有緊急病人需要做先，所以日子確定但時間就係唔確定嘅。姑娘話手術3-4日前會有醫院護士打電話畀你預約時間，留意電話。然後交咗一盒CLENPIQ(瀉藥)同一份說明書，簡介手術前幾日需要做啲乜。最後到櫃位埋單走人。

⭐️Step 2 等電話 除咗要等醫院確認手術時間外，仲有好多人呢幾日會分批打電話問你嘢。 電話1 ：來自醫院 - 安排”暫時”手術時間、安排COVID test預約時間、講解泊車地點、講解當日安排、講解即日費用、查詢一般病歷(對咩敏感、食緊咩藥、咩Vitamin、家族病歷等等)、解答你嘅疑問。 電話2 ：來自腸胃科診所 - 講解即日費用、解答你嘅疑問。 電話3 ：來自麻醉科醫生助手 (無聽到）

⭐️Step 3 Covid Test (nasal swab) 本身我係極度淆底做Covid test，因為睇過啲片啲人係篤到好入好似中槍咁。電話中嘅姑娘都話會好唔舒服＋會流眼水，就梗加驚。但當日其實一啲都唔恐怖，姑娘會用一支長過你一倍平時了耳屎嘅棉花棒塞入你個鼻了十秒，個感覺其實似你了鼻屎了到入咗少少咁。每邊了十秒。姑娘話以前的確要篤到好入，但佢話而家唔需要，前少少都可以驗到🌸。

⭐️Step 4 清腸 畀瀉藥當日姑娘同份說明書其實無乜2-3日前嘅指引。說明書只係提出咩藥同Vitamin要停食，然後手術前一日朝早10點前，可以食2-3隻蛋＋Toast，之後淨可以飲嘢飲到12點就禁止所有嘢入口。姑娘淨係話如果唔想痾得好辛苦，做之前幾日食少啲油/唔食油，兼少食肉會好好多。

我自己3日前就進行低渣飲食，其實都唔算100%低渣，我都有食少少肉。但主要係爛哂嘅肉類湯水類＋dinner roll。因為無肉真係好餓。然後瘋狂飲水。到前一日朝早10點，淨係炒咗兩隻蛋食。全日就係飲水同食Honey。食瀉藥時間為 ： 3pm飲一支瀉藥+ 5杯8oz水｜8pm 飲一支瀉藥 + 最少3杯水。飲完2個鐘內我就喪痾，痾到停唔到。當最後痾到好似放屁咁但出水，而啲水係無渣少少黃黃地就為之清乾淨💦💦。

TIPS☝️：本人手術當日嚟M，所以有M巾加持都算萬幸。因為有好幾次坐坐係不自覺地瀨咗出嚟，女孩子有M巾嘅著埋會好啲，除非你打算全日坐屎坑💩🩸。

⭐️Step 5 照鏡日 地點：Outpatient 醫院部份

A. 登記＋付款：手術時間原定10:45分，姑娘建議9:15分到達，因為要簽署文件同交費用。最後簽哂所有同意書，再喺櫃位交埋今次『醫院』收費，原價16000USD，保險優惠後為實收1168USD。(但最後保險帳單唔同咗，加咗少少價💸。)

B. 入房準備： -1 更衣：姑娘會準備一間房仔，隔離連埋個廁所方便你換衫/繼續痾。入到去就需要更衣，如果好不幸當日好似我M到，記得問姑娘拎Mesh pant+M巾。順便見識下大過頭盔嘅M巾🙉。

-2 血壓檢查＋貼嘢：然後有一位姑娘會入嚟問你好多嘢，又再問一次病歷嘅嘢。最後會同你量血壓，喺你胸上胸下貼4條心電圖儀器嘅線，手指又會痴住一條線去Mon住你嘅血氧。但所有嘅嘢其實係無插住啲乜，呢一刻你都可以自由活動。

-3 麻醉科醫生見面＋插IV(打點滴)💉：麻醉科醫生同另一位插IV嘅姑娘會入嚟打招呼，有手術上嘅咩問題都可以問。麻醉科醫生好Nice屎知我好驚又講笑話，最後又話會畀啲正嘢我等我無咁緊張😆。因為我上次ER係插手褶(手肘對上）個位，但原來今次個手術佢話因為會經常用到個IV，所以通常都會用手背位。姑娘都話手背會痛啲🤮🤮。但麻醉科醫生話其實都無所謂嘅，佢哋都可以遷就嘅。最後又咁岩我手背搵唔到血管，改咗插喺手褶對下少少個位，然後條IV就一直連住一pack fluid。直到呢個時候，你都可以去廁所嘅，但要抽住pack fluid同一堆線喺身。

-4 推床入手術室做鏡：又有另一個姑娘入嚟介紹自己，再對一對我手上嘅手帶同病歷。呢個時候就要同公子say bye bye啦。除咗衫褲內衣有一個袋，姑娘會幫我放Locker之外。手袋同鞋公子都幫我拎走，因為唔會再返返去嗰間房仔。

C. 手術室做鏡： 手術室入面會見返我個腸胃科醫生同麻醉科醫生，仲有4個護士，包括岩岩推我入嚟嗰位。佢哋會一個一個同你Say hello，介紹自己今日做乜。然後腸胃科醫生又會同我吹一陣水。不過我全程都好撚驚，淨係見到嗰度有好多機好多儀器。又on9驚自己醒唔返，個人好震。然後有位護士叫我含一個嘢係個口度，再幫我戴氧氣罩，最後就開始搞我條IV。麻醉科醫生一直見我震哂，就係咁足住我隻手話唔洗驚唔洗驚，最後我就訓死咗咩都唔知😴。

D. 訓醒： 麻醉藥過後訓醒，我係唔記得咗自己入咗院，一直諗點解唔喺自己張床。醒後就有位護士倍伴我，解答我啲問題同我講講照鏡結果，最後幫我拆IV同畀啲水我飲。柒況可重溫之前一個Post( #麻醉鳩up藥) 。而最重要嘅問題當然係幾時開始食得嘢？護士哥哥話即刻可以㗎啦，除咗唔好食辣嘢之外，都無乜需要注意。我上網睇都話要2個鐘到，又話唔可以食啲乜。但因為我真係好餓，2個鐘後我係食咗食鳳爪、皮蛋瘦肉粥、咸水角同奶黃包。

E. 出院： 成個手術過程大概個半鐘到，因為我醒唔到，所以訓多咗半個鐘。而手術後，腸胃科醫生已經同公子講過電話交待結果。因為條腸睇唔到咩問題，無潰瘍又無Cancer，最後抽咗組織做化驗，結果要幾日後先知。護士推咗我出院之後，就交咗一疊彩色印刷嘅胃鏡腸鏡文件畀公子。入面詳細紀錄唔同部份嘅圖，又會有一個腸鏡評分！最後我係有滿分9分㗎😎✨✨！

🍎感覺：成個過程痛嘅位我諗淨係得插IV嗰一嘢，抽返出嚟嗰陣啲麻藥都未過唔會痛。出院嗰陣個人都仲onon77咁，又無乜不適，完全唔知畀人上下抽插過。就算食完食鳳爪、皮蛋瘦肉粥、咸水角同奶黃包呢啲油炸嘢，我都無痛嘅感覺。不過無耐到夜晚十個鐘之外，一訓攪我就有啲胃痛，腸痛，但打完嗝放完屁又無乜事。過咗一兩日都係只係啲啲不適，無話好痛好唔舒服。

結論係：雖然我係一個淆底獸，但如果要我做多一次。我最驚嘅反而唔係好撚痛嘅點滴針。仍然係好驚醒唔返同埋……成24個鐘無嘢食落肚，13個鐘無水飲，真係好痛苦😷。

收費資料： 💸總收費 ＝ 原價13528USD /保險價3478USD -醫院場地🏥 : 原價9199USD/保險價1424USD -腸胃科醫生🧑‍⚕️: 原價1586USD/保險價537USD -麻醉科醫生👩‍⚕️ : 原價2088USD/保險價961USD -化驗科 👩‍🔬: 原價655USD/保險價556USD

其他資料： 腸胃科醫生：Dr. Dustin Kiker (十個讚✨) 地點：Cedar Park Regional Medical Center 地區：Austin, Texas 日期：2021年3月