移民前喺香港嘅歲月，一切太方便；食呢家嘢，完全唔愁。各區都有好嘢食，燒腊舖更係總有一家喺左近。移居後，實在覺得，燒腊呢家嘢，唔係理所當然。好唔好食仲係後話，搵一間喺你左近真唔係易事。 於是乎，我覺得「自家整叉燒」彷彿變成每個移居人士嘅必經階段。唔信你問吓他、她與他們，有無整過吖！ 澳洲以悉尼計，買叉燒醬同其他嘅有關醃料唔係難，不過，其中靈魂之一嘅玫瑰露就似乎未被代理入口，所以，都係差少少。 叉燒嘅名唔係浪得虛名，唔少鬼子都鍾意食，甚至會整。近年發現本地超市有啲預醃嘅叉燒，味道呢… 　嗯，六七成左右啦；個人經驗，加少少酒同埋南乳會好少少。 嗱咁，整開叉燒，無理由整細細嚿，因為難醃又嘥爐火，所以，多數都整起碼半公斤吧。 但整咗咁多，點算?! 於是乎，我果日就挑戰自己，究竟一嚿叉燒，可以去到有幾盡—食足一個禮拜，但要唔悶。 先嚟叉燒蛋飯（燶邊蛋），跟住叉燒炒蛋，之後叉燒蒸腸粉，最後叉燒炒飯。 後記：應該食咗三個月嘅 quota, 暫時同佢小別幾個月先。 更多關於搵食: https://www.facebook.com/CoffeeJourney.PeonyPottery IG: tury.sydney IG: chopstickfoodie.tury IG: turypeony.coffeejourney