英國屋保暖貼士 (一)🔥🏠

中央暖氣系統同熱水爐 踏入十二月英國天氣明顯轉涼，以下係有關房屋保暖嘅資料俾大家參考。利申：熱水爐 (Boiler) 方面我唔係專家，有錯請指正。 熱水爐 (Boiler) – 中央暖氣系統由熱水爐提供，而英國最普遍常用嘅熱水爐燃料有兩種，煤氣 (gas) 同電 (electric)。熱水爐供應熱水去浴室/廁所，廚房同暖板 radiator (或地暖 underfloor heating)。 煤氣熱水爐又再有分三種： - Combi (Combination) boiler：大多數現有住宅樓宇或者一般住宅換新熱水爐都會係選擇裝 combi，主要原因係比較慳位，冷熱儲水箱都唔需要，直接加熱自來水，加上高效率，足夠應付一般家居需要。 - System boiler：呢隻熱水爐要有位放一個熱水儲水箱，可以比 combi 供應更多熱水去多於一個浴室同時使用，適合較大嘅屋，亦可以接駁太陽能板 (solar panel) 去預先將儲水箱嘅水加熱，節省能源。 - Conventional (Traditional) boiler：傳統熱水爐類似 system boiler 要有一個熱水儲水箱，但同時需要有多一個水缸放喺閣樓 (loft/attic)，限制咗將閣樓改建做房嘅可能。 一般煤氣熱水爐壽命可以有十年或以上，但如果已經用咗十年最好搵專人檢查下同考慮下換個新D同更環保嘅熱水爐，因為如果冬天熱水爐壞咗都幾濕滯。Worcester 係一個幾大嘅煤氣熱水爐製造商，可以參考下佢嘅資料： https://www.worcester-bosch.co.uk/products/boilers/explained 煤氣熱水爐要維持一定嘅壓力先會發揮有效功能，壓力太低會唔夠水，壓力太高有可能會整壞個熱水爐。但間唔中個熱水爐壓力會自然降低，屬於正常現象，只要增值 (top up) 返去佢個建議壓力範圍 (pressure gauge 綠色範圍) 就可以，方法係用熱水爐下面兩個黑色制去較，留意返熱水爐保用說明。當然如果壓力降低得太快同太密就要搵專人去檢查，可能有喉漏水。有關煤氣熱水爐壓力呢間公司網站有更詳盡解釋： https://heatable.co.uk/boiler-advice/boiler-losing-pressure 煤氣錶：英國煤氣錶多數係白色箱，位於室外，要用專用嘅三角匙嚟開個箱 電熱水爐：電熱水爐同樣有分 combi 同 system 型號，都係要睇返間屋幾大有幾多浴室同時使用嚟選擇。簡單嚟講電熱水爐嘅好處係安裝費用較平，而且較煤氣熱水爐靜同無需申條喉出外牆，但長遠成本較高，而且未必間間屋嘅電力供應都足夠推動需求高能量嘅電暖爐，英國住宅地區多數都冇行三相電 (three phase)。以下 Homeserve 嘅網頁有比較電熱水爐同煤氣熱水爐 (題外話：推介大家使用 Homeserve 嘅熱水爐同水喉/水渠保障計劃，俾月費，有咩 plumbing 嘅嘢壞或漏水都可以 call 人上門整)： https://www.homeserve.com/.../gas-vs-electric-boiler.../ 暖板 radiator：大部分英國住宅都係用 radiator 嚟提供暖氣，通常裝近窗嘅牆身，而浴室亦有可以掛毛巾嘅款式。如果唔鍾意傳統款式亦可以搵用玻璃做嘅暖板。 地暖 underfloor heating：地暖有兩種做法，水暖或者電暖。英國地暖通常裝喺廚房同廁所，因為其他房多數都用地毯 (雖然間唔中會見到D屋連廚房廁所都用地毯)。地毯下有一層 underlay, 係會保暖D，亦比地板隔音好，但正由於保暖，安裝地暖效果會差。地暖好處係慳位，釋放牆身可用嘅空間，暖氣亦較為均勻同比較節省能源。但安裝價錢較貴，亦要考慮地板有可能要加高同接駁新喉去你本身熱水爐個位置，未必到到都可行。 火爐：當然如果你住 house 的話可以選擇用火爐 (fireplace) 燒柴，會係最環保，但要經常檢查同清理煙囪同火爐，亦要注意防火安全，比較多保養工作。仲要留意下其實好多市區地方都係 smoke control areas，所以有火爐都唔可以用，例如愛丁堡成個地區都係 smoke control area，就唔俾燒柴。因此大部分人都只會將火爐留為裝飾，甚至拆除煙囪室內嘅結構，令空間更實用。Smoke Control Areas 嘅限制可以喺以下政府網頁搵到：https://www.gov.uk/smoke-control-area-rules