泰國人邊走邊吃係國情。無論街上嘅行人、或者搭緊車嘅乘客、甚至的士司機、售貨員、屋苑管理員etc etc都有最少一包小食傍身。泰式小食百花齊放包羅萬有無處不在。佢哋喺市集、街邊檔、商場、政府大樓、展覧館等，無時無刻喺度引誘我哋。好多小食仲係好窩心咁樣設有bite size，方便一路行一路食，所以久不久都見到身光頸靚嘅ladies 優雅地掃街。

同大家分享下哈哈泰泰比較喜歡嘅小食，絕對個人化選擇 :

1.椰奶小薄餅 Khanom Buang 個底類似港式蛋卷，但係厚啲啲脆啲啲，盛載住椰漿同埋蛋絲或者鹹蛋絲，一啖一個，包含幾種滋味。通常哈哈泰泰會買雙拼，通殺。

2.斑蘭椰奶布甸仔 Khanom Khrok Bai Toey 斑蘭加椰汁本身已經係無敵組合，再將佢哋焗成迷你Q彈布甸仔，賣相同香味同令人不可抗拒。

3.炸彈魚蛋 Bomb Fried Fish Ball 同香港嘅煎釀三寶檔嗰啲炸魚蛋外型有啲似，但係食落完全兩回事，因為佢外層係炸到好似薯片咁脆，咬落去卜滋卜滋，點埋個酸甜汁⋯⋯只有喺泰國先有呢個爆炸式嘅樂趣。

4.炸花生餅 Tua Tod 椰香薄片襯托香脆嘅炸花生，令人忍唔住一塊接一塊咁樣食。一桶 Tua Tod 可以陪伴哈哈泰泰㷛最多兩晚劇。

5·椰皇雪糕 見到佢，哈哈泰泰無論有幾飽，都會叫醒第二個胃，自私食返杯。呢個雪糕集齊哈哈泰泰最鍾意嘅椰皇肉、椰子雪糕、椰果、芒果同埋花生碎，試問可以點忍。

泰國小食覆蓋範圍廣，滲透力強，幾日幾夜都講唔完。不過古語有云：好味嘅嘢一定肥。肥底嘅人往往為食又怕肥，一生就喺口福/口痕同內疚之間來回又折返。