溫哥華唔喺溫哥華島上面

加拿大 - 卑詩省 - 維多利亞 地膽推介 - 海外生活事件簿
  吸睛指數 32662       2024-01-28 22:28:30

溫哥華同溫哥華島之間隔住個海,搭船過海要大概兩個鐘。唔熟加拿大卑詩省嘅人好容易分佢哋唔到。

溫哥華係大城市,亞洲人比較多,有好多地區係好容易見到有中文字做招牌嘅店舖,甚至喺商場入面聽唔到有人講英文都唔出奇。大溫地區有個烈治文市,有幾間商場入面真係唔似身處喺加拿大。要食啱香港人口味嘅嘢可以有好多選擇。 但係溫哥華島就冇咁多亞洲人,島上嘅城鎮人口冇咁多,亞洲食館雖然開始多咗,但係口味都係就番本土人嘅多,香港人未必啱食。可能係因為隔咗個海,生活節奏亦都比喺溫哥華優悠。

Victoria 同 Nanaimo 係島上嘅大城市,兩度都有亞洲人開嘅 Fairway Market 嘅分店,Walmart 同 Costco 都多咗唔少亞洲食品,但係唔似得喺溫哥華咁方便。Quadra 街嘅 Fairway Market 有熟餸賣,但係七點左近就會收檔。其他本地超市都有炒麵炒飯熟餸,但係果啲係「雜碎餐」味道,係本地人習慣嘅中餐.

想知多啲 Nanaimo 嘅嘢可以去哩度睇(或者撳個 Nanaimo tag都可以搵到):https://dnlmdirectory.com/view_post/ab8cc642-b45f-4981-9197-92cca1ffaebf/ENG

其實 Victoria 係 Greater Victoria 嘅其中一個市區,有啲似九龍同新界都係香港咁。近年 Langford 不斷發展,好多人都搬咗去果度住,雖然巴士方面未有 Victoria 市區咁多,但係有車就會方便好多。Sidney 又有個 Amazon distribution center,因為機場同 BC Ferry 碼頭都喺果頭,或者慢慢會開始更多人搬過去都唔定。

島中間嘅 Port Alberni 最近開始大興土木,預備喺 Victoria 甚至喺其他城市租或買唔到住宅嘅人搬過去。因為近年越嚟越多人租/買唔起大城市嘅屋同樓,有好多長期租客被迫遷,有啲甚至因為租金太貴而變咗做無家者。

喺島上揸車同喺溫哥華都有啲分別。 溫哥華有 Sky Train,巴士都好似幾密,但係車亦都多,有時聽到人講到有啲車點樣橫衝直撞,搶位搶線… 我自己每次揸車出去都零啥緊張。 一海之隔,島上嘅路面情況好唔同。島上嘅人多數揸車時都好有耐性,雖然間中會有啲嫌你慢爬你頭嘅,但係極少見到塞車時有燥火動作。仲要間中會見到喺市區路上面走隻貓呀松鼠呀甚至鹿出嚟,啲車會停底等佢哋過咗先再郁。當然有時有啲「唔生性」嘅人踩住單車又唔守規矩阻住條路,但係因為平日路面車唔多,通常啲車都會就住嚟行。間中會見到其他動物過馬路,好似大小飛禽等等,仲要有啲路係會經過城裏嘅單車徑,總之喺Victoria 揸車都係慢啲好。另一樣係島上有唔少七八十歲嘅老人家,有唔少係自己住開又繼續揸車嘅,我識得有個 90幾歲嘅依家仲鍾意自己斬柴但係淨係日頭先揸車。

溫哥華嘅 sky train 同巴士都係Translink 包辨,收費形式同八達通相似。但係島上面係 BCTransit, 冇sky train, 同埋巴士唔係全島一樣收費。如果每個月唔係搭得多巴士嘅,月票或者冇咁抵。便利店同埋超市都有一張十個巴士飛,一次過買十個等於九折,兩個巴士飛就可以喺巴士上換個 有當日日子嘅day pass, 全日任搭,但係要記住問司機攞。

大溫哥華衣家多咗好多高樓大廈,有啲區一眼望落去真係好有大城市 feel (有啲地方直頭一望落去就即刻聯想到香港)。 島上嘅人口密度雖然不斷增加,但係又高又全部用石屎起嘅樓唔多,住喺城市屋同樓層嘅會留意到起居係好傳聲,因為島上十層以下嘅樓雖然外牆或者會唔係用木板,裡面間格十成九都係。近期新起嘅樓隔音會好啲,但係如果每戶都有洗衣機同乾衣機,鄰居各有唔同起居時間有時都幾麻煩。

上面提到大溫地區比較容易搵到啱香港人食嘅嘢。實在喺果度要買熟餸同飲茶食飯都好方便,酒樓茶室粥麵舖都有好多選擇,淨係揾杯港式奶茶就已經比島上容易好多。 喺島上面要揾間有港式奶茶但係又唔使 $3 以上一杯嘅地方就唔容易。如果鍾意每日起碼一杯嘅話,其實都可以就地取材用本地超市買嘅茶包自己整。我用 Ridgways 茶包:兩個 black tea 加一個 earl grey 放落個小茶壼度,用滾水浸佢三分鐘就倒落杯度加糖加花奶。咁樣可以沖大概三杯夠味嘅奶茶,不過第二第三轉就要浸耐啲等啲茶包出味。有人用其他本地 black tea 茶包沖,好似係 Tetley 同 Lipton 都得,仲有Red Rose,真係有心有興趣可以有好多配撘自己慢慢試。喺島上面買餸嘅攻略相信亦都會因為店舖冇溫哥華噤多而有所不同。最好係初到埗果時行吓唔同嘅超市,或者多啲行吓附近嘅地方睇吓邊度有啲乜嘢。 仲有一樣我相信溫哥華同島上面會好唔同嘅係聖誕節同新年嘅時候。Victoria 已經係島上嘅大城市,但係一到平安夜,舖頭食店大概六點前會開始收檔,聖誕日直頭好難會搵到有得坐底慢慢食嘅餐廳,好似淨係一兩間茶樓會開。超市就淨係得家庭式經營嘅或者會開。但係因為溫哥華亞洲人真夠多,相信聖誕新年會比島上面容易喺街上揾到開門做生意嘅舖頭。

因為我長期住喺島上面,對於溫哥華嘅其他嘢真係唔熟。生活方面,屋企裡面唔係太大工程嘅水電維修多數都儘量自己搞掂,YouTube 有好多片示範點做,一來可以慳錢,二來唔使頭痛究竟去邊度搵人同埋又要約時間等等。喺島上住得耐咗好可能會唔覺唔覺學識好多以前自己冇諗過做得到嘅嘢,因為求人不如求己,亦都可以發揮吓自己嘅想像力,不過如果係租地方住嘅就最好先搵業主問佢會唔會整同幾時,唔係自己物業真係要問過先好動手。

基本上大溫同島上嘅差別可以話大溫好多野都越嚟越似香港,而島上面嘅生活仲係加拿大人節奏,冇咁多香港人習慣嘅娛樂同效率,喺香港忙慣玩慣嘅或者唔會噤容易適應到。

有噤橋見到哩個住溫哥華嘅 YouTube video 講域多利同溫哥華嘅分別,就放喺度俾各位睇吓:

標籤
按以下標籤查看其他相關資訊
已複製
WhatsApp
評論 (要登入咗先可以評論)