相信每位搬嚟澳洲嘅朋友, 啱啱到埗會發覺同一樣嘢, 喺香港同澳洲嘅價格可以分別好多。

出街食飯貴, 少數怕長計, 又因為呢度時間多好多, 所以唔少人都開始煮下飯。咁當然我地係食香港嘅家常餸大, 自不然都會蒸下魚呀, 炆下肉呀... 呢呢呢, 咁蔥蒜薑就少不了, 蔥同蒜呢就真係大把, 價錢都平... 但係呢薑呢家嘢, 我諗十個有九個半香港人第一次見到呢到啲薑都會話: CMG, 有無搞錯, 咁貴。

因為氣候要求問題, 大部份嘅薑都係喺昆士蘭出產, 而且又係季節性, 所以咪咁貴囉; 同埋, 話說我第一次去唐人舖, 真係都差唔多分唔到, 因為佢有南薑, 黃薑, 仲有 Young ginger 同 old ginger...

係呀, 一見到就笑咗啦, 有幾 young 有幾 old 呀?!　XXD

價錢方面呢, 大家就真係要 die your heart (死咗條心) 因為唔會好平, 過去十年, 最平都係$30一千克, 最貴$90都有... (What?!?!?!?!) 係呀, 如果你從來唔知, 估到你有呢個反應。

好, 講返要煮飯嘅我地, 咁就喺薑好貴嘅時候搵下替代品, 如果煮餸要隻味(例如炆肉), 咁都有薑粉可以買, 呢度南亞裔人士唔少, 大量入口之下, 都幾平; 如果要嚟煲湯呢, 藥材舖同唐人超市嘅pre packed 都有老薑乾; 如果要嚟蒸魚炒菜呢, 就可以試下越南/泰國造嘅一啲樽庄薑片或薑絲, 都辣 ga... 但記住要睇下, 佢有啲似用醋浸, 有啲係微鹽浸, 個味有少少唔同。

當然如果薑當造時, 都可以買多啲放喺凍格日後用, 雖然雪過啲味爭啲, 但.... 好過無吖 .... 同埋, 無理由你蒸條魚, 嚿薑同條魚差唔多貴 ga ma?!