每次去日本旅行，行程緊密到多支牙籤都攝唔入，解體/劏割吞拿魚呢啲咁壯觀但又限時限刻嘅場面，始終無緣見識到。不過念念不忘必有迴響。終於發現曼谷嘅「壽司十番」不定期舉辦吞拿解體騷。二話不說即刻訂枱，一問之下發現，原來舉行吞拿解體騷當晚，「壽司十番」唔會要求最低訂枱人數或者最低消費，甚至唔一定要柯打吞拿魚。吞拿解體騷純粹係增值娛樂，以招徠/回饋客人。

到咗訂枱當晚，入座時仍有差唔多一個鐘先到主角吞拿魚出場，但係餐廳已經有八成客人入座。大家都興緻高昂，言笑晏晏。咁嘅氣氛下，我哋都唔執輸，一路飲味自慢梅酒，一路爐端燒蔬菜，打打底。飲下食下，全場已經滿座。喺大家熱切期待下，主角終於出場。見到吞拿魚被抬出嚟，幾乎全部客人一湧而上，不停影相打卡。負責劏魚日籍師傅等大家冷靜返少少，介紹條魚嘅背景資料之後，就開始進行劏割。師傅運用唔同嘅刀同埋工具，切割唔同部份，好似好輕鬆咁就將重量超過100kg嘅吞拿魚拆骨，分解魚肉出嚟。一舊舊紅潤晶亮嘅魚肉交由其他師傅處理，製作成為剌身或者壽司。

為食哈少急不及待落要柯打，三品剌身包括赤身，中拖羅同大拖羅，一次過滿足三個願望。見到師傅喺度手握壽司又好吸引，每客三件，每款一件。為咗唔好傷感情，一於每人各自一客剌身同壽司，實行Joey Doesn’t Share Food 主義。本哈始終最鍾意中拖羅，既專一又中庸。師傅見我哋食得咁開心又滋味，仲請我哋食拖羅魚蓉。卡觀卡。

最後驚喜在於原來今晚吞拿有推廣價，埋單大概四千泰銖。以環境、食物、服務計本哈認為超值。其實更重要嘅，係全場客人雖然係互不相識，但都係懷住同一目標，大家好似開派對咁樣渡過難忘一晚。都話喺曼谷食日本菜係定律㗎啦。