春夏秋冬 家居日常

Canada - BC - Victoria DNLM Reco - Life Overseas
  43590 views       2023-10-02 05:38:08

Victoria 通常最熱都係得三幾個星期,仲要係至多廿幾卅度,不過今年(2021)真係大劑,六月尾連續幾日最熱可以過晒 36度,但係個 heat dome 一過咗就涼番正常番。哩度夏天唔似得香港咁潮濕,所以洗完衫可以好快晾得乾。如果住 apartment 可以响個廳度晾,咁樣又慳錢又唔駛俾個乾衣機逐次咁扯晒啲纖維,真係件衫都用得耐啲。其實呢,一年四季都可以响屋企晾衫,因為天涼時候屋內多數會開暖氣,雖然好多時都好乾燥,但係要記住用風扇移動吓啲空氣。唔覺唔覺真係可以俾少好多電費。

講開電費又講吓冬天室內暖氣嘅嘢。多數都係用電嘅,但係有啲屋同埋樓會用煤氣,舊啲嘅屋會仲係燒油。政府好鼓勵啲人着多件衫,唔好開個暖氣太大,廿一度左近就好,亦都唔好出街前較低佢,因為冬天唔開窗之餘又涷又濕對乜都唔好。

哩度夏天雨水比較少,五月到八月乾起嚟好容易有山火。因為好太陽果時出面總會有些少微風,所以响街行得耐唔覺唔覺好容易曬傷。通常九月中會開始涼,然後慢慢會多雨,所以有件有帽嘅風褸/雨褸係必需。有一件waterproof 嘅大褸就可以一直用到三四月。最好有帽嘅,因為你真係唔知佢幾時落雨,同埋啲大小雀仔會隨時「轟炸」。 Victoria 凍極有限,唔似得中部噤顛,就算落雪都唔會太大同埋至多一個星期左近就溶得七七八八。我住噤耐最大雪係1996,冬天有對防水防跣嘅 boots/鞋最好,基本上除非你冬天日日出街行好耐,唔係就可以用足好幾年。

講吓買衫褲鞋襪等等。如果唔一定要買全新嘅,哩度有好多二手市場同舖頭,仲有啲網上二手買賣 sites & apps, 可以搵到又平又靚嘅嘢。去商場或者街舖買新嘢要另加銷售税12%。去慈善機構嘅二手舖好似起碼少咗5% GST (Goods and Services Tax) 定係 7% PST (Provincial Sales Tax),唔係好記得,因為我好日都唔出吓街買嘢。 哩度嘅人衣著方面可以話好隨便,真係自己舒服就得,有啲習慣一出街就要化晒粧亦有啲着到古古怪怪,有時啲人見你件衫靚會話你知,但係未見過當面彈人嘅。

買家居用品 (dinnerware, small appliances etc) 都係可以响二手市場搵到平靚正嘅嘢。不時啲人搬屋會嫌啲嘢多過頭搵人要 (唔使錢)。本地嚟講,買賣二手好多都係基於「用得唔好嘥」,真係冇二手先去買新嘅,儘量由自己做起唔去浪費地球資源。

上面講買二手野,網上嘅有 FB market place, usedvictoria.com (web site), VarageSale (app with web access), kijiji (web site, possibly has app too but I don’t use this so not sure), 我知嘅係咁多,應該仲有唔少。 實體店舖有 Salvation Army(救世軍), Saint Vincent de Paul, WIN (women in need), 另外有間 Value Village 喺市中心不過唔係慈善機構所以買嘢多個稅,仲有其他冇咁大規模嘅舖頭。有啲人冇乜好做就鍾意去「尋寶」因為真係乜都有㗎。Value Village 比 SallyAnn 同 Saint Vincent 貴啲但係佢多好多選擇。早十年左近我响 Value Village 買咗件有 Gore-Tex 底嘅厚風褸,唔使十蚊著足噤多年。鍾意睇書嘅好有機會執到寶,有新有舊,2023 價錢平均 $6 果頭,仲要買四送一。

如果買全新嘅嘢,Canadian Tires 同 Walmart 似係最平,不過好多係 made in CCP-land. 以前見過唔少 incidents 同埋自己都試過,部車响 Canadian Tires 個車房啲人手腳唔好,本來淨係去 oil change, 佢會話你部車仲有啲乜乜事叫你响果度整埋,但係根本係佢落手腳,所以就算近年冇聽過新嘅 complaints 我都唔會攞架車入去佢個車房。買全新嘅衫褲鞋襪家居用品,仲有 Winners,Home Sense,同 Marshall,都係美國公司。商場方面有 Bay Center, Hillside Mall, Mayfair Mall, 同 Westshore Shopping Center 比較多店舖。雪櫃爐頭可以喺 Trail, Home Depot, Lowe’s, Best Buy 等等地方買到。

依家有好多比較人口密啲嘅社區都會有間超市响附近,方便街坊行去買餸,但係亦有唔少人習慣每星期甚至隔個星期一次過買夠放入大冰櫃慢慢用。如果唔係必定要餐餐用新鮮材料,趁減價時買多些少慢慢用可以慳錢又慳時間。超市冰櫃有好多鮮冰生果同蔬菜,又因為近年多咗唔少亞洲人,愈來愈多超市有菜心白菜芥蘭等等,亦開始見冰凍雲吞水餃燒賣... 開頭嚟到可以逐間逐行去望吓打吓價。朝早七點半到八點幾係買平肉嘅黃金時間。我知 Fairway 同 Thrifty Foods meat department 嘅人會一路添貨一路貼減價 stickers 落去啲比較舊嘅貨度,Costco, Walmart, Wholesale Club, Quality Food, 同 Save On Foods 都會,但係唔知係咪都係果個時間。我近年好少去 Country Grocer 同 Superstore 買嘢所以唔清楚,不過照計都會咁做。另外仲有其他冇噤多分店或全國性嘅超市: Market on Yates & Market on Millstream (本地人做,好多有機同天然食品但係好似歐洲野多啲) The Root Cellar (有兩間,本地人做,主打新鮮蔬果) Red Barn Market (有五間,本地人做,好多有機蔬果同埋食品,佢哋自家整嘅煙肉又厚又好味) Whole Foods (美國公司,最近俾 Amazon買咗,好多有機/天然食品同護膚品) Lifestyle Market (有三間,本地人做,比較多健康食品)

藥房方面,好多間超市都有自己藥房,另外有 London Drugs, Rexall, 同 Shoppers Drug Mart. London Drugs 其實唔係住要賣藥,佢賣埋電腦音響等等,仲有好多日用品。Rexall 同 Shoppers 就冇賣電子產品 (起碼冇噤多), 周不時 Shoppers 嘅牛奶雞蛋會賣到好平。仲有一間 Pharmasave, 賣嘅嘢大概係 Rexall 同 Shoppers 之間。基本上你揾到佢哋個 websites 就睇到啲價錢。

哩度市政府每年都有個倒垃圾同 recycling schedule. 住屋嘅(house/duplex/townhouse) 到時到候攞啲一箱二箱出街邊就得。Recycling 要分類同埋已經洗乾淨。住樓果啲會有個公家地方有晒桶同埋箱。廚餘都好似有 pickup schedule。

巴士有時間表,最早好似六點開車,班次就主要跟返學返工時間,下午五點後就冇咁密。如果住得遠嘅就有時要喺市中心轉車。Google “BC Transit” 照計會揾到佢個 site, 裡面會有齊巴士路線時間價錢等等。最近除咗往常嘅現金或者車飛付費外,多咗個類似八達通嘅儲值咭叫Umo,有個app 可以用電話俾車費但係我未試過。依家仲係兩個半一程,五蚊可以玩足成日,唔記得月票幾多銀。

順便講埋搭的士。哩度冇得响街度 flag down 佢,吓吓都要打電話去的士台約。唔知上網會唔會揾到啲價錢,最常見係 Blue Bird, Yellow Taxi, 同埋 Victoria Taxi。有間淨係用電車嘅 Current。

講家居日常唔少得 internet & cable providers. 哩邊主要係 Telus, Shaw, 同埋 Rogers, 而 Shaw 最近俾 Rogers 買咗,照計仲有其他冇咁大嘅公司,喺個 local FB group 度見到話好平,但係我要花時間揾資料。

哩度除咗有三大電訊公司外,仲有啲其他 cell phone network providers 所以只要你有個 unlocked 嘅電話,可以每個月三二十蚊就有得用,不過哩個價錢主要淨係 local call and text。

暫時好似淨係得唐人街同埋 Fairway Market 有菠蘿包賣。Halibut House 有似樣啲嘅煎麵底三絲炒麵,佢嘅牛腩牛筋都好正。華麗園嘅牛腩牛肚都唔錯。茶樓有三幾間但係幾貴,兩個人都會四十幾蚊埋單。近年多咗啲台灣食館,主要係賣 bubble tea 同其他甜品。越南餐館都多咗,紅豆冰芒果冰牛油果冰都見多咗。如果唔係一定要食香港食開果啲嘢,哩度好多好嘢食㗎!

五月到九月基本上四點幾就開始天光,最夜要到十點左近個天先至黑齊,但係其他時間就日短夜長,五點左近就開始天黑。商場營業時間都同日夜長短有關。最早係閂五點半至六點,因為入黑後冇乜人出街買嘢。超市都好似閂十點,藥房比較早閂,實在六七點後街上真係冇乜人(星期五/六除外)。

入黑後唔少人煲 Netflix,或者玩 board games, 又或者準備定聽日食乜後日焗乜,好多都會留喺屋企或者去朋友度。哩度都有酒吧同埋 dance clubs 但係我唔係咁熟。有啲人會覺得悶,真係各花入各眼啦。

講吓啲相: 好多花果張係2021年四月中影。 有人果張係2019或者之前五月中個花車/表演遊行後响省府大樓前面影嘅。 水池結冰唔係成日有所以影咗佢,好似唔到幾日就冇咗囉。 有船果張係2021六月頭影。 FB market place 嘅 screen shots 同埋兩張買餸單俾你哋參考吓啲價錢。 張單嘅日子係月/日/年,哩個係美式次序。 Sport Chek 果張俾你睇吓新嘅衫褲係乜價錢。衣家照計會貴啲喇。 The Brick 果張俾你睇吓新嘅家俬大概乜價錢。衣家照計都會貴啲喇。 CRTC 果張係 2021 新嘢。 CHEK news 果張係 2021-6-28 FB post. 一藍一綠係我用嚟整類似港式奶茶嘅茶包:兩包綠色加一包藍色放落四杯滾水度浸三至五分鐘 (想濃啲淡啲自己喜歡啦),倒落杯度加糖加花奶,飲落有茶香。最近試過用 English Breakfast tea 加普通 black tea 茶包沖出嚟個香味似乎仲似街邊港式奶茶。有人用三個 Red Rose black tea茶包加一個 Lipton 茶包沖出嚟嘅顏色都好靚。 Mochi 同埋台灣麵可以喺起碼兩間大超市搵到。 個藍色箱係街坊整嚟俾人分享種籽嘅,Victoria 有好多街坊箱,有啲係 free library,有啲叫 blessing box 係俾人放啲多餘(但係未用過)嘅日用品同食品俾有需要嘅街坊自取。 James Bay market 係其中一個五月到十月每星期都有攤檔嘅地方,Esquimalt, Moss Street, 同 Sidney 都有,另外仲有好幾個新嘅 community markets。

Tags
Click on tag buttons to see related posts
Copied!
Whatsapp
Comments (Login to comment)
Kate Pluton 2024-01-04 14:21:57

Nestled in the heart of the bustling metropolis, restaurant is a culinary gem that beckons both locals and visitors alike. Beyond its unassuming facade lies a gastronomic haven that seamlessly blends culinary excellence with chic ambiance. Visit https://www.theflowershopnyc.com/