入鄉隨俗篇 - 睇樓注意事項 (屋內業主提供設備及資料） 之前講過有關屋外的注意事項，我地開始行入屋，睇下有咩要留意，有朋友於whatsapp入面都講，睇到又點丫，唔通有得租唔租咩，無錯，我地香港人剛剛到步可能租屋比較難，不過知道有問題，做定準備做好記錄，好過有咩事到時先諗解決方法好丫。 之前提到英國政府有本天書，業主係需要提供以下的設施及資料俾租客，大家可以先瞭解一下先。

How to rent checklist https://assets.publishing.service.gov.uk/.../6.6642_MHCLG...

1）必須❗ EPC (Energy Performance Certificate) 最起碼要Band E，呢份野應該已經放左樓盤廣告入面，只要都是預計一下之後的水電煤大約的費用，你band C就可以問番Band C的朋友大約費用作為參考；不過，如果係買樓的朋友就要睇清楚，睇清楚份文件係幾時做，當時有咩問題，有咩建議，同現場環境有無改善或者變差到，例如Boiler有冇換，窗的Double glazing情況又點，Loft的保溫做成點，因為呢D都會直接影響你下次更新的費用，或者影響租務。

2) 必須❗Electrical safety check, 有網友問過係咪有呢份文件就即係所有電器電掣都唔駛檢查喇？唔好意思，唔係，呢份文件應該每5年1次，所以你租時唔一定update架，另外，電器應該係另一個PAT test所檢查，只有業主提供的大電量電器先有張Label，不過好多都無做。所以，各位租或買樓的朋友最好都搵件簡單的電器 (USB叉電器) 去試晒所有電掣有冇電，頭幾日都盡量試晒業主提供的電器，睇下有冇壞或者唔識用，或業主有無提供說明書或者上網搵唔搵到說明書喇。英國業主通常提供的電器包括（洗碗碟機，洗衣乾衣機，雪櫃同爐頭）, 至於提供幾多及新舊款就睇下個業主喇。

3) 必須❗Smoke alarm & carbon monoxide detector，業主是必須於每一層及Gas的bolier外的位置安置上述設備，於租約開始時必須能運作，而之後就靠租客定期檢查，如果有問題就匯報Agent/業主，再安排維修或者更換。

4) 必須❗Boiler certification，英國規定業主每年都要檢查Boiler，所以一定要問agent/業主拎番份報告，一定要檢查個Boiler用唔用到，其他的radiator/地暖點用，尤其依家咁的氣溫，冇暖氣暖水好慘架。

5) 強烈建議❗Security or Thermal Control System 英國近年的安居智能技術不停改進，所以當租或者買樓時一定要睇清楚之前究竟有無留低咩系統，有冇咩account或者password要交代低，因為隨時個保安或者溫控系統係兩手之前租客放低，佢隨時可以幫你開鎖熄Boiler，最慘係凌晨時份false alarm唔知點處理好。

6) 食水系統，英國大部分地區都是硬水地區，而且天氣寒冷，好多時屋主都會安裝過濾系統或者即熱設備，最好問清楚系統的牌子model，上次定期維修更換的時間，免得系統已經停產或者太耐無換濾心，影響食水質素。 以上係業主應該提供的資料及設備，希望進一步幫到大家瞭解間屋的情況，因為最近要準備聖誕節，所以分享比較慢，希望一星期可以出到一個分享，而下一篇就會進入屋內，正式咁全間屋睇下有咩要留意。

呢篇文章係轉載自 [追追趕趕 跌跌盪盪在英倫] 記得follow 人哋呀～^_^ https://www.facebook.com/Orpington2020/