移居泰國前，香港朋友A：「你要去泰國? 泰國咁熱咁曬，你要做足防曬，正午至下晝兩點千祈唔好出街呀！」 移居泰國一年後，香港朋友A：「Eeee? 點解你仲白過以前住喺香港嗰陣嘅?」 首先要留意返，泰國並唔係一年四季都咁熱。由十一月至二月，平均氣溫都係攝氏三十度以下，稱之爲「涼季」，分分鐘涼過香港。有時氣溫去到二十度以下，要著秋褸仔出街。 至於「人喺泰國住會變白咗」並唔係一個謎，亦無需特別幫襯美容院做啲乜乜乜療程。主要都係我喺曼谷少咗同陽光玩遊戲，就算玩都只係玩伏匿匿。 曼谷冇海灘，冇行山徑。想去呢啲地方就要專程去外省，但正常人都唔會成日去。曼谷屋苑大部份都有住客會所，包括泳池同gym room ，想做運動只需要落樓下/上樓上就可以(仲冇藉口偷懶添)。 喺香港等巴士亦係我曬太陽嘅好機會，有時目送走咗嘅一班車，就有大拿拿二十分鐘日光浴可以享受。曼谷BTS覆蓋咗我大部分活動範圍，所以而家好少搭巴士。如果要去BTS覆蓋以外地方，我會搭BTS再轉的士/Grab。既環保又快捷。 話雖如此，無論身處何方，我嘅字典裏面都唔存在佛系皮膚保養呢個詞彙。係人都知，世上冇醜女人只有懶女人。日後有機會再同大家分享切磋䕶膚經歷。