近年(2020-2023)見到有啲喺香港嚟到先發現 Victoria 比想像中「鄉下」, 始終香港人口密度比哩度高好多，所以好多野都比哩度方便。

實在平時除咗市中心多啲人氣, 其他地方都真係幾「鄉下」. 行人路唔闊有時甚至冇, 更且哩度住宅區冇乜街燈, 冬天日照時間短, 如果出入搭巴士就最好袋住個電筒仔. 住宅區嘅巴士站未必會寫住邊個巴士線, 咁你最好知道你自己去個地方嘅地址用 Google map 認路. 香港公共交通實在方便, 所以嚟到會需要時間去習慣. Victoria 環保意識都幾重, 除咗有回收站之外, 好鼓勵用二手同埋用廢料 DIY. 如果一個人過嚟唔想一次過買大包大袋糧食, 除咗超市有散裝賣仲有 Bulk Barn.

如果一個人過嚟, 哩度大部份私人租房係唔會喺個房門度整個鎖, 似乎係得成間屋逐個房租出去嘅業主先會咁做. 同埋後者多數要求現金交租. 如果租嘅房冇喺屋內有洗衣乾衣機俾你用，而又唔想用手洗，可以儲夠一個半個月攞出去洗衣舖自己入銀仔洗同乾。另一樣係哩邊嘅屋/樓好少全部石屎, 所以好傳聲, 唔似得香港閂埋門就聽唔到隔離打麻雀.

另外一樣同香港好唔同嘅係餐廳張單度唔似香港咁已經例埋「加一小費」- 哩度堂食同外賣都會加 5%稅, 雖然冇「加一」但係有好多過數機會問你俾幾多貼士, 有啲10%起跳, 有啲15%甚至18%起跳, 有啲可以俾你揀 $ 定係 %. 然後加上哩度有好幾種唔同嘅過數機, 真係可以去四/五間餐館個個都唔同😬 有唔少新到嘅會非常唔慣, 相信亦都係因為喺香港真係好方便, 出街堂食或者外賣係生活日常, 但係哩度嘅人出街食飯比較似特別節目, 尤其係老一輩嘅本地人.

仲有一樣香港人唔慣嘅係真係差唔多乜嘢都要俾稅. 有人形容加拿大係萬稅國家. 喺 Alberta 淨係得 5% 聯邦稅, 但係喺 BC, 大部份唔食得嘅野要加多 7% 省稅, 所以貨架上嘅價錢只係件貨嘅價錢, 未加稅. 以出街買菠蘿包為例, 一次過買唔夠半打就要俾 5% 稅, 細盒裝朱古力奶要俾 5% 稅但係同 size 嘅白奶唔洗俾稅.

哩度可能係寧啥多書蟲, 因為淨係比較有規模嘅本土書店已經有三間, 然後每年報館又會有個為期兩日嘅勁揪二手書攤, 排隊入塲果條龍排到轉彎, 塲內仲墟冚. 有次搵到射雕英雄傳其中一本.

Victoria 除咗吸引各國遊客, 有好多唔同種族嘅人過咗嚟定居, 街上常見有菲律賓人, 印度人, 中東人士, 歐洲不同國籍嘅人, 講西班牙文嘅人，當然少不了中日韓, 所以有好多唔同語言, 咁即係會有好多唔同英文口音.

香港有幾十年係國際大都會, 同美國紐約相似, 但係比起其他北美嘅大小城市真係相差好遠. 而 Victoria 比起 Vancouver 又細啲, 人少咗各樣生活上嘅嘢相對就冇咁方便.

希望哩個 post 幫你了解多些少 Victoria 嘅生活.