呢幾年嘅自助火鍋喺不同城市開到成行行市, 廿零卅蚊就食到你飽一飽, 知但係近日某國又爆出食品安全問題, 咁就令小編諗起到底呢一啲有問題嘅食品, 會唔會好大機會流入海外市場？話明自助火鍋佢收得你一個價錢就梗係要比啲平嘢你食, 佢先賺到錢啦. 所以為咗安心，小編通常都會揀啲唔算最平，但係有良好商譽嘅先會去, 今日就介紹間日式shabu shabu buffet連鎖店叫Shaba-yu俾大家, 命仔緊要，小編成日提醒自己唔好成日俾個價錢牌吸引, Follow DNLMDirectory FB / IG 同小編一齊做個精明消費者, 實行搵食不求人。

Shabu-you 係一間位於Illinois州入面一個叫Schaumburg 埠仔嘅入面, 大概距離芝加哥一個鐘頭車程咁上下, 佢黐住一個Outlet Mall叫Woodfield, 所以食完之後仲可以行街睇戲宵夜直落😬😬

佢係一棟獨立嘅building, 好多張枱好闊落, 最啱一家大細開party, 入到去侍應會問你想要邊個組合, 我哋揀咗B, 有豬牛蝦又有壽司, 揀咗之後你就喺佢個tablet嗰度order肉食壽司同炸雞, 然後佢有四個湯俾你揀, 小編揀咗Sukiyaki, 你可以加嗰啲熊仔Soup Topping, 但小編唔想太複雜，所以就簡單啲, 小編嘅屋企人因為係食齋嘅，所以佢揀咗個紫菜湯底, 佢都話好正, 揀好晒嘢之後, 我哋就可以去個Buffet Table搏殺。

個Buffet Table有熟食又有火鍋類。先講熟食, 佢有炸魚, 牛丼, 咖哩飯, shake shake薯條, 燒墨魚丸, 蘑菇, 仲有好多小菜務求"則"飽你為止, 味道唔差㗎，但係真係唔想嘥位, 所以每樣試咗少少就收手嘞。去到啲火鍋類, 佢嗰啲丸呀各樣嘢都應有盡有, 嗰啲sauce都非常之日式, 個芝麻yuzu 汁小編覺得係最好嘅, 酸酸哋好refreshing, 最鍾意其實係蔬菜嗰部份, 因為有佢竟然有茼蒿, 要知道茼蒿係街市長期嘅高價菜有時會貴到$5.99/磅, 佢俾你任夾其實好抵。 所以我覺得呢個item係幾回本嘅。

去完Buffet Table, 返到去張枱嗰啲湯同肉已經滾到㷫烚烚召喚緊我去嗒佢, 肉一啲都唔肥膩, 唔係好似嗰啲小肥羊九門火鍋店咁, 好鬼肥, 然後佢哋啲湯又好鹹同有層神秘油脂喺上面, 我覺得呢間Shabu-you啲湯睇落好清, 食落又好夠味, 唔會覺得佢好渾濁同埋所有嘢都好乾淨, 佢啲烏冬同埋蕎麥麵又食得出煙韌嘅感覺, 同之前喺日本食嘅非常之相似. 佢啲炸雞好大件，好脆好好食, 但係要好耐先嚟到, 所以早啲order多幾份有着數, 壽司小編就覺得係最差嘅, 佢剩係得券物, 仲要好dry, 唔推介, 唔好嘥位。

跟住講個甜品部, 小編會用非常之好玩嚟形容, 首先一開始佢哋有一部pancake機, 你跟着指示喺佢嘅左下角揮揮手佢就會啟動, 然後部機就會吱啲batter 出嚟, 跟住就會經過一條輸送帶烘熟佢, 跟住你將隻碟擺喺輸送帶嘅尾端, 咁佢就好準確咁樣將個pancake跌落你隻碟度，跟住你鍾意搞乜都得啦, 有生果有Syrup 。呢舊嘢感覺好日本, 好好玩。跟住仲有刨冰機, 佢教你點樣將啲冰擺入去個刨冰機，然之後再加你想要嘅口味入去, 小編無試到, 但係都覺得幾得意, 跟住仲有Pop corn 生果同埋少量日式甜點, 其中入邊小編覺得個cream puff最好食, 細細粒食到好飽, 都仲想食多幾粒, 好邪惡。

埋單$80幾蚊, 小編同媽咪去, 佢老人家有八折, 如果你帶埋小朋友仲有五折, 兩個人食唔平, 但係質素係高嘅, 食完唔會水腫, 因為唔會太鹹, 小編覺得係值得嘅。跟住再翻查資料，發現原來佢係一間日式火鍋連鎖店, 喺台灣馬來西亞都有分店。係日本人經營, 佢嘅總公司Skylark喺日本有超過3100間食店, 經營20個唔同牌子, 今次揀芝加哥嘅埠仔為第一間喺美國開嘅火鍋店。知道咗咁多之後覺得佢係值得推介嘅, 因為感覺佢商譽良好, 食得安心, 比起其他鬥平嘅火鍋店，小編會揀佢，因為在商言商, 其他火鍋店個價錢平一定要喺其他地方減省開支削減質量, 佢先至可以維到本, 所以小編都係跟着呢個道理搵食。

今日講住咁多先, 如果你哋有好嘢分享, 歡迎你哋喺下面留言或者登記發文㗎~