搬咗嚟澳洲之後，當然要知道去邊度買嘢啦，因為多好少好都要煮下飯。

本地嘅大型品牌超市 包括有Coles, Woolworths, Aldi (好似香港百X同惠X咁), 同埋細型地區性嘅IGA (Independent Grocers of Australia) 同標榜直接喺農夫入貨以保新鮮及減低剝削嘅Harris Farm)

本地超市 - 獨立式經營，以前年代，有啲人買個超市嚟做投資移民添。

民族性特式嘅超市 - 香港人可能住落都知嘅有啲係意大利超市，韓國人超市，越南超市，日式超市，華人超市等等，總之，你會比較容易搵到啲果個民族嘅食及日用品，有啲個包庄仲係印有果個語言嘅文字。

值得一提呢，華人超市通常喺一啲華人比較多出沒嘅地方，連鎖式嘅以悉尼嚟計就有通利、通用同新人人；而賣嘅嘢就大包圍，產地可以係中國、香港（例如一丁麵，維他Ｏ茶等等）、台灣、馬來西亞、印尼、韓國、越南、日本等等，移民之後真係發覺有好多嘢以前係未見過、用通過，或食過。 如果要買一啲日常嘅如包庄好嘅食物，油等等，一般西人超市都有，呢幾年，甚至都會賣一啲唐人菜例如係黃芽白（佢地叫大白菜）、芥蘭（唔少鬼子佬好鍾意Chinese broccoli)、上海白菜（香港以前叫小唐菜）等等。仲有一啲醬料如豉油，米粉，甚至係港式包庄Ｏ茶都有。

但當然，如果你要買一啲唐人菜就基本上都係要喺唐人舖買，包括：菜芯、通菜、韮黃、有時有嘅青蘿蔔、芋頭、芥菜、唐蒿、梘菜等等。喺香港你會喺菜檔買呢啲，但係喺澳洲就好少有華人式喺菜檔(鬼子佬嘅反而有），而通常係華人超市賣埋。

價錢方面，當然入口嘅嘢係會貴啦，好似維ＸＯ茶為例，而家普遍至少都賣澳幣$6(折合港幣約$35)六包, 一丁麵呢，大概要$5(折合港幣約$30)五包，一紮唐人菜大概$1-1.5 (折合港幣約$6-8)，無辦法啦，入口貨要運費、人工、銷售稅等等。

但以前喺香港買嘅外國食材(呢，果啲你多數喺City Super 呀, 灣仔呀, Soho 呀等等先買到嘅)就當然好平咯，例如係海鮮、意大利新鮮粉類及醬料、水果、蔬菜、奶類及芝士等等。

綜合我個人經驗呢，最好都係多去探討一啲本地生產或大量入口嘅食材，如果唔係，淨係靠香港我地一般食開嘅嘢，咁你一定會覺得好貴。 澳洲算是一個多元文化嘅國家，好多好嘢食嘅，Happy eating~!