Mailbox Peak Parking：(https://maps.app.goo.gl/VQUmfjfBfenBv98q7) 距離西雅圖市中心四十分鐘車程。

今次係介紹：華盛頓州 西雅圖附近 最出名嘅單日行山點 Mailbox Peak。

雖然華盛頓州係有好多國家公園，但如果你住市中心或東區，最近嘅國家公園都要揸車單程超過兩個鐘。想去近啲，但又要風景靚，最佳選擇係沿 I-90 公路上嘅高山；而其中一座最出名嘅係 Mailbox Peak。事關佢唔只係附近最高點，擁有近 360 度無敵景觀，山頂仲有一個七彩繽紛嘅郵箱，打卡度爆燈。另外，呢條登山路線有近十英哩，總攀升四千呎，通常預計行七個鐘或以上，難度算係高，成為本地登山界一個門檻，好多人當正佢係 Rite of Passage 咁爬。

咁受歡迎嘅地點，天氣好嘅時候梗係逼爆啦。試過朝早六點停車場已經滿人，仲要唔係週末啊！泊去附近嘅 Overflow Parking 要來回行多兩英哩，仲要都可能會滿，有興趣嘅人一定要記得早出發喇。