曼谷鬧市水門 Central World 7樓超級市場係我同師奶仔朋友們一齊歡聚嘅好地方。行到最篤篤裏面嘅 Fine Dining Food Hall (留意：唔係Food Court）以類似 marché 形式經營，但係裝潢、座位 setup、服務同一般餐廳冇分別。客人入座之後，可以到不同 counter 慢慢行下睇下，睇中左直接落柯打，跟住就施施然返埋自己座位，食物準備好就會有專人送上。當然如果你唔想行，亦可以睇餐牌點菜。

呢個 Food Hall 有好多唔同嘅食品供應，嚟幾次都試唔晒。Grill Bar 主打肉類/扒類，有本地亦有入口嘅，選中邊塊扒，就可以同廚師講想點樣煮，連漢堡包都有得揀，小朋友/大細路就最開心。

喺 Mediterranean Bar 可以自選唔同嘅材料&做法，廚師就會製作你心中所想嘅 Pizza 或者意粉，新鮮即煮即焗 tailor made, 零舍稱心又滋味。無需不必要爭抝，例如 pizza 可唔可以落菠蘿。

Deli Bar 有唔同熟食選擇，包括咖喱，炒麵/飯，燒牛肉，燒雞，燒排骨，沙律等等，仲有我嘅至愛 porchetta。諗起昔日中環太子大廈返工，時常去二樓間delicatessen 排隊買燒雞/燒肉 lunch 嘅日子添。

Ocean Bar 供應新鮮入口海鮮，例如龍蝦同埋生蠔，全部都係流水淙淙咁樣養住喺缸裏面，同時亦有魚生/壽司可選。價錢尚算合理，例如fine de claire 99銖一隻，即開即食又有service算唔錯。但係最最最重要嘅發現，係佢做特價嘅時候，竟然係990銖一打！！！ 我哋試過三個人食咗六打🙊🙊🙊。以免走寶, Ocean Bar 係我哋每一次嚟到 Food Hall 第一時間 check check 嘅地方。

食生蠔又點可以唔飲冰凍白酒呢? Food Hall 附設嘅 Wine Cellar 規模唔算大，但係有齊日常飲用酒類 , 搭調唔同食物冇難度。如果冇頭緒，店員都好主動幫手，通常唔會叫人買貴嘢。最開心就係買咗嘅酒，係有人開埋，放入埋冰桶送到你張枱，仲唔收開瓶費。

喺呢個級市場裏面嘅綠洲，我哋可以慢條斯理，慢慢食慢慢傾慢慢飲。每晚仲有現場爵士樂表演，好chilled。唯一美中不足就係晚上關門時間九點，所以我哋喺呢度嘅聚會要早少少開始，不過最早都只係下晝五點，因為泰國每日下晝兩點至五點有禁酒令。

Central 喺Chidlom 有另一個Fine Dining Food Hall，經營模式大致上一樣，不過內容有少少唔同，下次有機會再同大家分享。