住響英國嘅手足相信呢幾個月都因為封城而悶到hi hi。個個都會問幾時有針打、打完係咪有得放監...

答案係：睇你有幾危。

如果你係70歲以上，或者有長期病患而需要居家隔離，基本上響二月十五日之前NHS已經寄左信叫你去打第一針。

跟住就到50歲以上，或者有長期病患（但唔需要隔離）果班。佢哋應該會由二月十六日至到四月果時收信預約打針。留意嘅係：長期病患係唔包括差唔多係香港人都會有嘅哮喘。

最後果班會響秋天之前接種第一針。如果你年青力壯、冇病冇痛，基本上你仲要等多3-7個月。

好喇，咁邊隻疫苗先好呢？暫時英國只有P牌同AZ牌有得打，M牌仲未有貨返。P牌話95%有效；而AZ牌就7成幾。不過P牌啲數就收收埋埋，唔似得AZ牌咁響刺針出文。個人覺得兩隻都有效，而且最重要係：信·得·過！而Sino字頭果隻喎... 路透社話歐洲藥品管理局冇收到佢嘅申請，可能留返俾自己友，打完之後「好訓咗」咁喇。

筆者因為從事高危嘅病毒科研，日前已經打咗P牌疫苗，打完之後駁頭有少少興，算唔算係「水土不服」就見仁見智喇，但絕對冇「好訓咗」囉！

謹祝各位牛年身體健康，發個好夢！