住過獅子山下嘅木屋區同大埔屋村嘅Ivan，1994年 12 歲跟家人移民到美國德州，以為生活會變好，從此一帆風順，但命運並無厚待佢，反而因為屋企嘅經濟困境加上讀書唔成，17歲嘅佢遇上人生交叉點，正當佢徘徊喺搵工做定跟老豆學炒鑊嘅時候，機緣巧合下佢參加咗佢high school 嘅就業展，喺入邊認識咗國民警衛軍隊（National Guards of the United States即美國儲備軍嘅一種），被招募入伍，佢嘅一生從此改變。

你係點樣加入軍隊？ High school junior year 嘅時候，讀書成績唔理想，唔知做乜好，校長叫我參加當時嘅就業展，令我遇上國民警衛軍隊嘅招募，之後訓練咗一年，再返去完成中學學位，再之後參加飛行訓練就遇到人生另一個轉捩點。

你係邊一年正式當兵嘅呢？ 1999年10月15日係我正式宣誓嘅日子，當天我只有17歲，好似之前咁講，喺中學最後兩年之間完成基本訓練。2001年我剛19歲，啱啱中學畢業過完個暑假，喺 9 月 3 號去Virginia 接受直昇機訓練課程，8日後911發生，當時懵懂嘅我都唔知道戰爭係一件乜嘢回事，因為喺911發生之前係太平盛世，好多人當兵都係為咗佢嘅福利好少真係需要上戰場，但係911就係我正式成為軍人嘅轉折點，加入咗正規軍（US Army)，我嘅自我身份認同同埋對做軍人嘅使命感開始確立。

即係話911之後美軍好需要人嘅時候，你自發自願去參與軍隊？以你了解，點解美國唔會好似其他國家咁有強制兵役？ 參加軍隊係因為你想要為國家做事，如果你係被迫嘅話，你根本唔會perform得好，被迫愛國嘅人，一來係會覺得嘥時間，二來覺得軍營係監獄，完全冇上進心，反而會令到軍隊士氣降低。所以美軍係非常之注重軍隊嘅心理健康。 外面有好多blog係講軍營訓練，但係有時係局限於步驟同埋體能上訓練嘅要求，冇講心態， 我覺得當兵嘅心理質素係直接影響你到底適唔適合做呢一行。我覺得甚至比體能同埋耐力更加重要。當然要成功，呢幾樣嘢都係相輔相成。 所以加入軍隊，除咗體能上嘅訓練，仲會考驗你耐力同埋耐性。同埋有好多意志同承受力嘅訓練，外在同內在都會鍛鍊你成為一個軍人。

你去過邊度打仗？邊一度令你最印象深刻？ 波斯尼亞，伊拉克同阿富汗。經歷過波斯尼亞嘅種族清洗，伊拉克嘅獨裁，阿富汗宗教性嘅行動。第一深刻係伊拉克，第二就係波斯尼亞。親身體驗過戰爭對小朋友及無辜平民作出嘅無差別傷害。 例如喺波斯尼亞嘅地雷唔係攞嚟阻止敵軍，係用嚟傷害無辜，係無差別咁樣殘殺無辜。因為經歷過呢啲種族仇殺，所以我唔鼓勵用暴力去作為報仇工具，使用武力要以保護人命同財產為基礎，唔係用嚟報仇。Eye for an eye makes the world blind 係基本道德主義。三個戰場都比我唔同嘅體驗，三個地方都有唔同嘅危險性，同埋當時我嘅思路都各有不同，可以講嘅嘢有好多，因為篇幅有限，唔係三言兩語就可以喺呢一個interview度講到， 所以我將佢哋記錄咗喺本書入邊。成本書圍繞着一個香港嚟嘅屋村仔點樣由一個不務正業渾渾噩噩嘅小朋友，從參加軍隊訓練同戰場之中蛻變成一個有道德價值觀同埋使命感嘅軍官。令到大家對美軍軍官呢一種身份有多一層嘅認識，同埋了解佢光環背後係隱藏着乜嘢嘅歷練。

你係點樣由一個小兵升到去軍官嘅呢？ 呢個就係靠咁多年來嘅資歷同經驗再加上民事同埋軍事嘅教育，一步步咁樣升上去。由二等兵升到下仕嗰一個職位就係自動嘅，計年份，好似你完成咗一個訓練，你就會升一級。到到中仕就比較特別，因為去到中仕以上嘅職位就會越來越少，所以篩選會越嚟越嚴格，要經過選拔先至會一路升上去。直至到軍官呢一個職位，其實就有一啲機緣巧合，因為平常人好難會升到呢一個位置，喺1990年代大部份嘅軍官已經係離開咗軍隊，因為冇咁大需求，但當伊拉克打仗，對軍官嘅需求突然間變大咗，需要人去填補空缺，咁我就被徵召咗去參加一個軍官候選人訓練課程，經過一輪非常辛苦為期六至八個月嘅考拔同訓練，喺30%嘅成功率入邊成為咗軍官。

經歷訓練嘅艱辛同埋戰場上嘅險境，你有諗過放棄做返個普通人嗎？ 無時無刻都想放棄㗎，我諗我想放棄嘅時間比我想完成嘅時間多，但係當我想放棄嘅時候我會諗到兩樣嘢，第一就係點解我要做呢樣嘢？會諗返起我嘅初心。同埋我已經投資咗咁多時間同埋人力資源喺呢度，如果而家放棄嘅話就會前功盡廢，之前所做嘅都變得無意義，個cost of loss比你放棄之後得到嘅大好多。

第二就係我張枱上面長期有兩張相，相裏面嘅人比我好多人生動力，係我嘅心靈支柱，我就會諗如果我放棄嘅話我會唔會嘥咗佢哋當初對我嘅支持同鼓勵？當我諗到呢兩點, 我就再無放棄嘅念頭。

係乜嘢令到你花咁多時間寫呢本書呢？ 第一樣嘢就係我阿富汗嘅時候遇到一啲經歷，令我唔想對人生有遺憾，我對相裏面嘅人曾經有一個遺憾，我死裏逃生之後唔想呢個遺憾延續，所以，我就寫呢本書出嚟。

第二個原因係我細個嘅時候嚟美國發現我自己對身份認同同人生定位好模糊，我嚟到美國人生路不熟，完全感覺唔到人情味，加上我自己嘅原生家庭同埋親戚冇為我帶嚟好嘅經歷，令我感覺非常之辛苦，但係從軍之後，我開始搵到自己嘅價值同埋信念，建立自己嘅身份同使命感。我將我嘅經歷分享比啱啱嚟嘅香港新移民， 特別係我哋呢幾年經歷過嘅動盪，有好多後生仔離開咗香港，我希望呢本書可以比佢哋一個鼓勵同埋共鳴。

最後你有啲咩寄語海外香港人呢? 香港人要記住自己係香港人，但係你生活喺美國呢個地方你就要無可避免地知道自己會變成美國人，同埋要記住對美國效忠嘅職責同埋喺美國生活嘅義務。 我希望透過呢本書同喺世界各地嘅香港人講，其實香港人係好堅強嘅，香港未發跡之前，我哋嘅上一代都係靠白手興家，就算搬咗嚟外國，我哋好似一棵植物切咗出嚟無咗根，然之後移植去第二個地方咁，但係只要比啲時間同埋勇氣，喺新嘅地方重新建立你嘅家園，就會可以好似我嘅書名咁再次見到不一樣嘅晨曦。

小編的話

因為香港冇軍隊，所以軍人係一個小編好陌生但係又好fantasize嘅行業。但係除咗喺浪漫化嘅電影入邊，根本好難會知道真正貼地嘅從軍生涯係點樣，以一個香港移民嘅角度去講更加係少之又少。喺兩個鐘頭嘅對話入邊，其實仲傾咗好多當兵嘅有趣逸事，例如佢係點樣分配時間有讀書又當兵？國家有任務比你嘅時候，係咪好似007咁send封fancy密函比你？但係因為篇幅有限，講唔晒咁多嘢，所以如果大家想知道更加多Ivan 從軍嘅心路歷程，以及佢枱頭嘅相中人係邊個？同埋點解會對佢有咁深刻嘅意義？可以留意以下連結預訂佢11月出嘅新書，小編都已經訂咗一本，睇完之後再同大家寫書評！

香港實體書店銷售 界限書店 旺角亞皆老街16號旺角商業大廈20樓A室

美國網上預售 https://www.facebook.com/imyelo1314

如果你想代理預售呢本書, 可以用呢個email聯絡佢: stditw11@shsu.edu 想知多啲海外香港人資訊生意同埋人物專訪就記follow 返我哋嘅Social Media Channels 啦～

https://www.facebook.com/dnlmdirectory https://www.instagram.com/dnlm__directory

《迥別晨曦》

黃伊凡和周諾兩人是調皮的1980年代後屋村男孩。五年級那年，命運讓他們與袁楚翹相遇。三人由冤家變朋友。六年級時，伊凡的父母決定移民美國。九七問題讓楚翹一家亦要移民英國。兩人持續通信，周諾留港。

因家境每況愈下，伊凡加入美國後備軍。但好景不常，九一一事件發生，美國陷入戰爭狀態。伊凡出征波士尼亞，閱盡種族仇殺的悲劇。除卻軍職，他上大學、並曾擔任獄警多年，見證人性的可怕和醜陋。美伊戰爭對軍官的亟需使伊凡得以進入軍官學校，自此他的人生再度發生轉變，無論是學業、職涯，抑或是愛情──

多年來，楚翹一直是他的心靈支柱；而在軍官學校的畢業典禮上，伊凡遇上了艾美，情感的軌跡悄然轉變……

著：黄 識 出生於香港，後隨家人移民美國。於在德州大學達拉斯分校獲得博士學位，並在學術期刊《刑事司法評論》和《警察雜誌：理論、實踐和原則》發表專文。美國陸軍退役時軍職為少校，他曾被調派到波士尼亞、伊拉克、阿富汗和十多個國家。喜歡寫作、飲食、旅行、科幻電影及閱讀。

著：悠 然 出生於香港，小時候移民英國。喜歡旅行和平面藝術設計。熱愛科幻小說、電影及散文。現正自修藝術史。