倫敦區名解謎遊蹤

UK - England - London DNLM Reco - Life Overseas
  37164 views       2021-01-06 11:18:25

初到貴境,唔知有幾多人同筆者一樣,會望到啲地方名然後就覺得好有趣,或者好想明白佢哋其實點解㗎呢?咁筆者都承認,其實在下或多或少算係一個文字控,不過啲地名總有佢哋嘅來由或者意思,就點都係不爭嘅事實!

由邊度開始講起好呢?🤔 Greater London 總共包含三十二個 boroughs 自治市加埋 City of London,三十三個分區啲名真係各有特色~不如就精選啲搞鬼啲嘅同大家分享啦!

舊時經濟

首先筆者見到一個幾得意嘅,見證到大倫敦由農業社會轉型至現代經濟體,就係:Lambeth。唔知有冇人見到個名就諗起個 Lamb 字呢?原來真係有關㗎喎! 本身 Lambeth 原名係冇咁 speaker-friendly 嘅,叫做「Lambehitha」(好彩簡化咗!😂),解作小綿羊嘅河岸休憩之地,其實都幾詩意~另一方面都可以睇到曾幾何時,喱個今日國際大都會嘅貴價地段,本來係小羊享受水草嘅地方。

另一個得意嘅區名,筆者會揀 Croydon。原來除咗養綿羊,倫敦附近一帶仲曾經有啲好特別嘅農作物。Croydon 喱個名來自古英文 Anglo-Saxon 嘅「croesa deanas」,然後蛻變到 「crogdene」,意思原來係「番紅花之谷」。估唔到眼前車水馬龍有人有車有屋嘅地方,曾經係盛產香料 saffron 之地。

另類產品

然後到 Chelsea,雖然大部份香港人見到佢第一時間會諗起「車仔」車路士足球隊,但係個名係來自一樣風馬牛不相及嘅嘢嘅。佢原文叫做 Chelchith 或者一啲類似嘅串法,意思係「白堊岩之地」呀。你冇睇錯,係叫做白堊岩,同恐龍滅絕嘅白堊紀寫法一樣嘅。白堊岩英文係 chalk (但唔係「粉筆」呀!) ,係一種石灰岩,呈白色,好多個別稱包括「白植土」、「白土粉」(唔好睇漏中間個字,please~😅) 等等,最緊要係,佢有咩用呢?緊要到要用個地方名去記錄佢?原來白堊係可以用喺種植方面,係肥料嘅其中一種成份。咁去到今時今日,以前喱個肥料原料出產地,依家就變咗球星出產地喇!

尊貴氣息

有一個比較容易聯想到嘅,就係 Kingston。佢個名係唔係話畀你聽喱個地方同 King 有關?冇錯!Kingston 真係古代嘅王座。十世紀嘅時候,國王都係喺喱度加冕嘅。喺 Kingston Guildhall 附近嘅 Coronation Stone 「加冕石」到依家都繼續紀念緊喱一段歷史。

仲有一個好出名嘅 Westminster,「西敏寺」我相信大家都聽過喇啩?!喂喂喂,唔好搞錯,唔係家庭電器牌子 Siemens 西門子呀吓!😝 咁 West 好明顯唔需要解釋,佢嘅方位係西面啦,相對以前嘅古城係,依家都繼續係。Mynster 就係舊式英文嘅 church 咁解。題外話,筆者好鍾意 mynster 喱個字,大家即管諗下佢有咩咁特別?喺西方嘅教堂,除咗相對城市而言,亦都係相對聖保羅座堂 St. Paul Cathedral,即係 Westminster 就係「St. Paul Cathedral 以西嘅教堂」,叫做「西敏寺」係唔係好精簡、貼切呢?👍

歷史傳統

另一個不得不提嘅 borough 就係 Brent。佢個名冇前面嗰啲咁有趣,但係 Brent 就係所有 Greater London 嘅 boroughs 裏面個名最古老嘅,歷史直頭可以同 London、Thames 喱啲睇齊。Brent 遠至羅馬時期之前已經存在,名稱來自凱爾特文 Celtic,意思係「神聖的一個」或者「高的地方」,而同名嘅河流時至今日,經過千百年嘅洗滌,都依然每日繼續流經 Brent 喱一區。

創新創意

講咗咁多個有歷史由來嘅名,都想講返一個「新作」嘅名。喱個名講明畀你聽佢係「新」嘅,估唔估到係邊個 borough?就係「Newham」囉!你或者話,點解個名咁唔似英文嘅?係呀,佢係 1965 年 Greater London「成立」嘅時候先至出現㗎~原來佢係由 East Ham 同 West Ham combine 而成嘅,所以就取名 NEW-ham 囉。咁自古以來神聖不可侵犯嘅 Ham 字又點解㗎呢?火腿……就梗係無關啦!😂 Ham 喺喱度係「沼澤圍繞嘅低地」嘅意思。

普遍命名

除此以外,其他 boroughs 嘅名好多都係來自或者演變自人名,例如領主嘅名。上面介紹嗰啲就係三十二個自治市裏面筆者嘅精選,即係在下覺得比較有意思同埋搞鬼嘅地名由來,希望你哋都覺得有趣啦!

認識多啲自己身處嘅地方,對於建立歸屬感,其實都好有幫助。筆者只係提供多一個角度畀大家輕鬆咁了解多啲喱個地方。如果喱度係你新嘅家園,希望少少嘅拋磚引玉,可以吸引到大家用更多唔同嘅切入點去關心、認識多啲喱個地方~

以上嘅資料,全部都係來自網上嘅,如果有各路高人發現有咩錯誤,歡迎不嗇指正!筆者定當盡力查證、改正錯誤。

Tags
Click on tag buttons to see related posts
Copied!
Whatsapp
Comments (Login to comment)