慳錢+環保「2 hits combo」揾*食*絕招

UK DNLM Reco - Restaurant Recommendations
  56975 views       2021-06-14 20:37:32

又要平、又要好,邊度揾得到?

民以食為天好明顯係香港嘅一大寫照,但係香港人喺享用美食對自己好啲之餘,相信都好希望可以對荷包好啲。今次就想介紹下點樣可以一次過滿足曬三個願望:「慳錢」、「環保」、「美食」! 😉
貼士唔只一個,記得睇到尾呀!

(一) 超級市場到期貨

唔好咁快噓!喱樣嘢應該唔使筆者多講,其實好多人去到行超級市場都喜歡留意下「快將到期」嘅新鮮食品,部份 supermarkets 會將喱類「近期食材」擺埋同一個位置方便顧客尋找,另一啲就會擺返喺嗰類食物嗰度,咁大家選購嘅時候就要細心少少,留意下嗰啲「特價貼紙」喇! 💪 特價時間方面呢,視乎嗰啲食物嘅貯存期限長短,舉例肉類或者蔬菜嗰啲只得幾日期限嘅食物呢,大部份超級市場就會喺到期日嗰朝一早就減價,例如減 30% 咁樣。要買到喱啲即日到期嘅新鮮肉類,就要一早去買,最好就係超級市場開門第一個小時裏面啦,因為真係手快有手慢冇嘅~ 而另外有啲例如 Tesco Express 等等嘅細超級市場呢,或者係去貨冇咁多咁快嘅原因,佢哋有時去到下晝見到某啲食品,例如方包、薯蓉、沙律……就會再減第二次價、貼返相應嘅價錢 label,然後去到黃昏就會再減。喺某啲剩餘貨量比較多嘅時候,筆者見過方包減到一折、薯蓉亦都只係三十便士一 pack! 所以到底要早啲去買,還是晏啲去買,就要視乎情況而定嘞~

(二) 外賣尾班車

上面嗰個小貼士可以話係入門級,咁下面喱個就應該算係進階版。😝 唔知大家有冇幫襯過啲外賣壽司、便當嘅專門店,見過佢哋夜晚幾點開始,即係收舖前一個鐘或者半個鐘開始,會有特價或者全店八折之類呢?咁在下當然就唔會介紹喱啲咁基本嘅嘢啦! 準備介紹嘅,就係喺喱個 concept 之下,衍生出嘅一種「外賣」模式,同樣可以滿足上面嗰三個願望,而且可以令店家、喱盤生意嘅老闆、食客三贏,加埋減少浪費幫到地球,直頭四贏㖭!👏 如果大家有諗過,到底啲到期食物收檔都賣唔去咁點呢,筆者可以講下幾個喱啲食物「下場」嘅可能性:捐贈、送畀員工、變成廚餘、直情被棄置變垃圾😭…… 咁為咗避免咁多咁好嘅食物浪費曬啦,就有公司將喱啲食物同一啲想慳錢嘅顧客連繫咗,擺喺同一個平台上面,等顧客同食店可以各取所需:食店臨收舖將餘下食物盡量出售、客人喺心水食店用超抵價錢買到好味食物!😍 講咗咁耐,可以去邊度揾咁正嘅嘢先?同類型嘅公司就唔只一間嘅,最多人幫襯嘅一間就叫做 Too Good To Go。原來只要去到 Too Good To Go 網頁,就可以睇到更詳細嘅資料同埋 download 到佢哋嘅 app,喺夜晚舖頭收工時間前可以訂購當日 available 嘅「新鮮到期美食」。個名叫做「Too Good To Go」其實改得真係非常貼切,顧名思義,喱啲食物根本全部都仲好地地,絕對適合客人食用,要掉咗佢哋,真係 too good to go 嘅~ 另外亦有 Karma 喱一個 app 亦都有同樣功能。Karma 嘅網頁 karma.life 呢,更加有「唔靚仔蔬菜 box」(Karma Box) 可以畀顧客訂購,仲直接送上門㖭!不過都係未覆蓋得到全英國,有興趣可以去佢嘅網頁 check 下自己個 post code 包唔包喎~😉
身在北愛爾蘭嘅話呢,就可以試下 Gander,都係大同小異嘅。話時話,有冇人知點解 Gander 個標誌會係鴨嘅?😂

幫襯邊間好?

個人覺得,除咗有啲心水食店嘅嘢食值得透過喱個平台幫襯之外,仲可以趁機用平一截嘅價錢,試下一啲平時好想試但係唔 sure 啱唔啱口味,而且價錢又唔平嘅店舖。 依家 Too Good To Go 或者 Karma 等等嘅平台仲一直擴張緊,希望吸引更多顧客之外亦都不停吸納新嘅食店加入佢哋嘅平台,讓更多嘅客人可以有更多嘅選擇。

總之,經喱啲平台購買嘅外賣餐點、樣衰蔬菜等等,除咗超值,仲可以幫地球減少浪費,真係食都食得更開心呀! 👍👍👍

慳到錢儲起之餘點樣可以再令財富滾存越賺越多?有港僑拍埋片介紹點樣慳錢儲錢不求人!
Tags
Click on tag buttons to see related posts
Copied!
Whatsapp
Comments (Login to comment)
SFHKers 2021-07-06 18:07:10

搞到我都想離開三藩市去英國