悉尼旅客必遊之地中，The Rocks 當然是其中之一。能夠喺呢個地標開食肆的確唔易，當中有一間，竟然係香港人開，勁！ Sergeant Lok - 令我諗起香港嘅雷洛總探長。

今日同一大班朋友到訪呢間店，首先係俾佢地嘅建築物所吸引。老闆娘話，原來呢個傳統英式建築物已經有200幾年嘅歷史，佢以前，係呢一區嘅警局，所以，有啲房其實以前係用嚟暫押犯人（即係好似香港警署啲羈留室咁), 嘩, 喺羈留室食飯，都幾有趣！而最厲害係我問老闆娘點解會搵到呢個地點，佢話其實係政府搵佢地，因為之前搞啲食肆都搞得唔錯，所以被邀申請租用呢個地方搞餐廳。

今日因為人多，預早訂咗幾道菜嘅食物。每一味都有特色，前菜Kingfish sashimi 好新鮮，記得之前有幾個homestay 日本學生都話，喺悉尼食到 Kingfish sashimi 好開心，因為又新鮮又平。墨魚汁嘅calamari 黑卒卒睇佢唔出好惹味…. 咁多個餸我最鍾意個肇慶beef rib, slow cook 咗, 用最少嘅調味料帶出牛嘅味，好冧，超好味！

滿意！

其實好開心見到香港人嘅靈活性同創意，喺一間餐廳嘅裝潢、菜色嘅選材、煮法同擺設上都絕不兒嬉，非常之出得大場面，怪唔得一個星期四嘅晚上除咗我地，都仲有咁多人幫襯。而更重要係，成件事絕對相稱於呢一個悉尼嘅地標，同埋一個咁有歷史意義嘅懷舊建築物！

星期一：休息 星期二至四：中午12時至晚上10時 星期五及六：中午12時至晚上11時 星期日：上午11時至晚上10時

更多關於搵食: https://www.facebook.com/CoffeeJourney.PeonyPottery IG: tury.sydney IG: chopstickfoodie.tury IG: turypeony.coffeejourney