多倫多[良心冰室] 市場價值研究報告大公開

加拿大 - 安省 - 多倫多 地膽推介 - 搵食不求人
  吸睛指數 1074       2024-07-03 02:16:13
By   13muimui

一去到多倫多,小編就問加拿大地膽有邊間茶餐廳佢哋會推介,其中有一位就講咗呢個名「良心冰室」。第一次聽「良心冰室」呢個名,好戥佢擔心,佢會唔會俾太大頂高帽自己?今時今日講良心講人話有無錢賺㗎?仲有佢呢個係對觀眾同客戶嘅一個承諾,如果稍有差池,兌現唔到,就好易gg 。但係就更令小編好奇,到底佢咩事咁傲嬌叫自己良心冰室?

佢係喺一個小小嘅shopping mall仔入邊,我哋早咗20分鐘去到,已經見到有一條小小人龍,有大概5至10個人喺度等緊,可能因為知道當日好凍嘅關係,我地係門口等咗一陣,佢就算未正式開門,都俾我地入咗去門口一個小小嘅waiting area 等住先。服務暖心 🥰+1 分。

一開門,佢已經滿晒人,真係好似好受街坊歡迎咁🤔🤔所有裝修同擺設都好有心思,有香港文化色彩濃厚嘅舊廣告poster之餘,仲incorporate 咗好多新香港artists 嘅創意文化作品,感覺佢真係好身體力行咁樣支持香港舊有同埋現有嘅文化。所以成個環境同埋裝修都加分。

咁食物又如何呢?佢個Menu堅係豐富,除咗有懷舊平實嘅沙嗲魷魚魚蛋,又有令人越邪越愛嘅流心魔鬼西多士,仲有好多打卡必選嘅大推頭重量級包類, 例如:紅魔鬼香辣炸雞菠蘿包同鵝肝黑松露菠蘿包🤯🤯🤯🤯 可惜當日只得小編同友人兩個女人仔,食力唔夠強勁,只係order咗個西多士,煲仔沙牛麵,同焗豬扒飯。

流心魔鬼西多士 上面有煉奶牛油,超流心蛋黃勁澎湃,無論打卡定自食都令你有無上嘅滿足感 。唔算好大份,但係如果再大啲就會覺得好漏,所以呢個size啱啱好。👍👍

招牌秘製煲仔沙茶牛肉出前一丁配魚肉春卷 又係唔算好大份,味道濃郁好味,但係真係唔算太特別同驚喜,但係味道各方面都合格

金牌焗芝士豬扒飯 又係細細地一份,唔係好似美國LA嗰啲港式茶餐廳咁大到兩個人都食唔晒,佢嘅鋪排係比細分啲你,咁你就可以嗌多啲唔同嘅菜式試多幾樣,小編係鍾意呢一種手法嘅。如果講味道嘅話,佢落足芝士,拎起上嚟嘅時候有拉絲,但係個茄汁同埋飯都略嫌乾咗啲,個炒飯亦都冇蘿蔔青豆粒,剩係得蛋,所以感覺冇咁豐富,豬扒味道OK唔算太突出。

總括嚟講,佢個Menu有新式創意嘅item, 又有懷舊香港原風味嘅item,新舊都平衡得非常之好,而且服務非常之暖心,員工態度非常之welcoming,因為當日我哋去嘅時候係早餐第一餐食唔落咁多嘢,所以嗌嘅嘢都係以保守懷舊風味為主,如果下次去會想試多啲其他創意菜式,但係overall係稱職同埋美味嘅。

從商業角度嚟睇,佢基本上人流無停過,不斷有客入,佢好成功咁將新舊嘅香港風味貫穿喺裝修同埋食物入邊,呢種做生意手法跨越唔同年齡層嘅客戶,非常老少咸宜。喺佢門口貼住嘅posters,亦都睇得出佢非常支持local同埋香港人社群嘅活動,而佢嘅員工都非常之友善同welcoming,成個客戶體驗由客服到裝修到食物都見証到佢標榜嘅「良心冰室」呢一個品牌形象。

所以小編覺得一個有良心行得正企得正嘅Business Model係可以搵到錢同sustainable嘅,唔需要一定攀附權貴走捷徑先至可以搵到食。當然做生意唔係咁容易,由選址開始,到到天時地利人和,一啲大環境嘅經濟因素同埋社會動盪都會影響生意,但係多倫多人傑地靈,有一個相對平穩嘅營商環境,所以孕育出好多成功嘅良心小店 🫶🫶🫶 希望大家繼續大力支持有骨氣有良心嘅港人小店啦 ~~ 如果你試過其他菜或者有其他唔同意見嘅都歡迎你留言㗎 😊

Cafe De Hong Kong 良心冰室 11 Fairburn Dr Unit 12-15, Markham, ON L6G 0A4, Canada

Business hours: Mon 10am-7pm Tues CLOSED Wed-Sun 10am-7pm

標籤
按以下標籤查看其他相關資訊
已複製
WhatsApp
聯絡方法
聯絡電話 (905) 604-8851
地址 11 Fairburn Dr Unit 12-15, Markham, ON L6G 0A4, Canada
評論 (要登入咗先可以評論)