叮叮 叮叮！相信大家都搭過香港嘅電車！每次返香港時一定搭下電車欣賞港島嘅風景。
國家歷史地標 三藩市纜車係美國西岸歷史最悠久而且最具特色嘅交通工具嘅表表者； 由1873年開始為三藩市居民服務至今將近150年。鋼纜藏於地面亦係現今世上少有嘅人工手動操作嘅纜車系統。由於其他公共交通工具嘅營運成本較低，原本有23條路線嘅三藩市纜車系統依家只係剩返3條路線 。話雖如此，三藩市纜車早於1964年被命名為國家歷史地標， 係非常值得遊客打卡嘅「移動地標」！每部纜車須由兩名Muni職員操作，一個大大隻隻嘅操作員在車廂內負責啟動同剎車而另一個工作人員在車尾負責乘客上落安全及售票。 雖然三藩市居民依家甚少乘搭纜車代步，但係每年客運量超過七百五十萬人次！
纜車博物館 想了解更多關於三藩市纜車嘅歷史，大家不妨去位於1201 Mason街夾Washington 街嘅纜車博物館參觀！一入到依個紅磚建築物就會聽到不停嘅轟隆轟隆聲，依度就係所有纜車嘅中央動力供應站。館內除咗可以參觀唔同時代嘅纜車及其他展品外亦有唔少嘅打卡位！依個博物館仲要係北加州極之少有嘅免入埸費嘅博物館！
開放時間 4月至10月︰上午十時至下午六時 11月至3月︰上午十時至下午五時
