平時非常之鍾意行博物館嘅小編一知道要去日本嘅時候，機票都未book就睇吓呢間宮崎駿博物館啲飛點賣，可以點去，一去到佢個website大部份都係唔係好user friendly, research咗一陣先知道原來要早一個月嘅10號book，即係如果你6月去就要喺5月10號呢一個特定日子上網搶飛，小編research嘅時候係4月幾，咁我就要set定alarm，Set晒Google reminder，計埋時差，5月10號喺當地時間早上10點望住個電腦嚟買佢啲飛。買飛當日，我login入到去個網站，就喺網上排隊，同6000幾個人鬥快，我排4百幾，然後都等咗30幾分鐘，先至可以正式揀日子買飛，佢嘅票價一啲都唔貴只係1000円，直頭抵到笑，因為喺美國閑閑地一個濕鳩博物館或者體驗都要$20-$30美金。

買飛link : https://www.ghibli-museum.jp/en/tickets/

但係佢要你等咁耐，長時間去plan去put effort入去買佢張飛就代表你要好有誠意咁樣去visit, 我直頭有啲三顧草廬嘅感覺 🙂‍↕️🙂‍↕️

終於到真正參觀嘅日子，去到當地都算容易搵，但係都要搭車搭一輪，到步嘅時候，因為小編早到，所以都要等咗一陣，佢亦都非常之提倡大家要準時，遲到就唔俾入，仲有唔知係咪因為想保持神秘感，入到去唔可以影相😲聽到好多家長都怨聲載道，好似好不滿咁同啲細路仔講「呢度唔俾影相㗎 ，媽咪都冇辦法 🙂‍↕️」 但係後來小編又發現佢原來可以用1000円買一本場刊咁入邊又有晒內堂嘅相，如果保持神秘感嘅話咁又點解要整本場刊呢？所以話日本人姿姿整整麻麻煩煩都唔係完全冇根冇據。

入到去係咪真係咁值回票價呢？講真1000円嚟講一啲都唔貴，睇咩都值㗎啦，現實係佢個場地唔算好大，佢俾我感覺亦都唔係真正想搵錢，唔係好似迪士尼咁樣，水都要charge你，佢只係好想你尊重佢嘅創作，好想話俾你聽佢哋花咗好多功夫去建構呢啲故事同埋卡通片，小編都係一個創作者，當然非常尊重呢樣嘢。入面有好多好立體好夢幻嘅房，係會令到你好Excited, 亦都好多手本繪本，佢唔會好似D100（迪士尼一百周年展覽）咁廣泛咁大，但係都睇得出係用心之作，由度橋到繪圖到上色，每一個工序都係好多人力物力心機同才華去建構，所以係值得一去值得一睇嘅。

知但係，另外又有一個問題就係佢大部份嘅描述都係日文，連最後尾播卡通片嘅部份都係日文，咁如果佢係想做遊客生意嘅話，會唔會有英文或者其他語言會更加好呢？ 小編一方面好讚揚佢哋捍衛自己本土語言，以日文為重，以其他外文為輔。但係作為一個旅遊點，用唔同嘅語言可以令到其他國家嘅人多啲了解你，唔會更好咩？

再行入啲，個gift shop 基本上係人頭湧湧俾人瘋狂購物，好多嘢都賣晒，但其實有好多嘢都係MIC所以要買都睇清楚。

再講吓佢個coffee shop，又係有幾樣小編想食嘅嘢都賣晒。你話係咪好特別呢？其實都係一啲好簡單嘅嘢，一塊麵包幾塊生果同埋whipped cream, 咁你擺得靚啲啲，加個意境落去，咁食落就唔同啲囉，但係又唔會飽同埋都係empty calories, 冇乜特別營養可言。

總括嚟講，成個博物館，由展覽到食物都算係精緻，唔貴同都算貼題可以一試，但係有心理準備真係未到好味同好好玩嘅程度，佢傲嬌嘅態度同埋喺某啲位幾執着又唔算好User Friendly, 如果想去體驗人哋文化嘅話呢個係一個必去之選。但係如果你想好似迪士尼咁玩幾日都唔厭，又開心又好玩又夢幻，宮崎駿博物館就未必係一個非常好嘅去處。

今日講住咁多先，下次再介紹多啲特別又好玩嘅博物館俾大家。