上集介紹咗賓州，今集我哋就講吓乳房。(無誤) 滑雪呢～當初歐洲白人殖民美國，有法國人去到懷俄明州 (Wyoming) 見到幾座山峰，唔之點解覺得佢地好似大奶奶，於是就起咗個法文名 Grand Tetons……雖之然個人係覺得三個並排嘅乳房係有啲異類啦，不排除係隆胸失敗造成。(誤)

介紹返： Grand Tetons National Park — Paint Brush Canyon - Cascade Canyon Loop

全長大概 20 英哩，起點同終點都係 String Lake Trailhead 嘅停車場。呢條行山路徑曾被 Backpacker Magazine 評為全美最難「單日行山路線 」(Dayhike) 嘅第九位。畢竟除咗距離長，佢嘅攀升高度有近四千五百呎，平均坡度近 10%，最高點超過海拔一萬呎，所以單日行完佢唔係一件容易嘅事；加上佢嘅風景又真係好靚，好多人就算體力夠都會選擇 Backpacking 兩三日慢慢嚟，無謂趕時間。沿途可以欣賞野花、高山、冰湖、河流、瀑布、野生動物；對曾經嘅都市人嚟講，真係睇極都唔厭。

String Lake Trailhead Parking (https://goo.gl/maps/NuRizkGNEUhfdVH3A) 距離鹽湖城大概五小時車程、滑雪勝地 Jackson Hole 半小時車程。

要注意嘅事項：

1. 又係 Permit 話晒係國家公園入面，公園入場費就一定要俾㗎啦。同之前提過嘅加州國家公園一樣，想 backpacking 喺野外露營係需要額外申請 backcountry permit。呢個 permit 每年都有 quota，其中三份一俾人預早 book，通常一月頭已經有人開始上網搶。剩返嘅三份二 quota 就留俾人 walk-in 去當地嘅 visitor center 爭。https://www.nps.gov/grte/planyourvisit/bcres.htm

2. 高原反應 雖然冇加州最高峰 Mount Whitney 咁高，但如果上到近一萬呎都會有部份人覺得呼吸不順。解決/預防方法喺之前個加州篇有講過就唔重複。

3. 熊啊、野牛啊、鹿啊、土撥鼠啊 懷俄明州唔只有黑熊，仲有更為兇狠嘅美洲棕熊 Grizzly Bear，所以都係需要孰悉野外面對同應付熊嘅方法(加州篇都有講)。另外就算係食草嘅動物如 Bison / Moose / Elk 唔好當佢哋係溫順嘅動物隨便接近，一般嚟講安全距離係要離開佢哋起碼 25 米，而距離熊等捕獵動物係要起碼離開 100 米。如果要露營 backpacking 嘅話，需要將食物同有氣味嘅物品如牙膏等放入 bear canister 儲存。除咗食物氣味以外，仲有一樣嘢要留意嘅係鹽份。當爬山流汗後，身體肌膚隨汗帶出嘅鹽份其實會好受小動物歡迎。所以擺低個背囊時要經常留意，有唔少案例係土撥鼠之類嘅小動物會嚟咬爛背囊條孭帶， 因為上面嘅汗乾咗後變成好味嘅鹽粒。

4. 冰雪 因為地勢同相對高海拔，呢個地點最適宜嘅時間係7月底至9月頭。太早去嘅話有好多高處地方未必融晒雪，就可能需要特殊裝備先會安全。

想一家大細歡樂遊？附近 Jenny Lake 係一個好選擇，圍繞湖一圈大概 7 英哩而且相對平坦。 Jenny Lake Trailhead Parking (https://goo.gl/maps/VDrXTeMPBeN3m3Zv5)

想有挑戰性嘅單日路程？推薦 Amphitheater Lake，大概來回 11 英哩，攀升 3500 呎。 Lupine Meadows Parking Lot (https://goo.gl/maps/izBsbDMBjjq8CH1v5)

由於懷俄明州有兩大國家公園，一篇文就真係講唔晒，黃石國家公園留返以後有機會先講。

以下附上當年第一次帶團三日兩夜 Backpacking Paint Brush Canyon - Cascade Canyon Loop 同 Amphitheater Lake Day Hike 所影照片，僅供參考。