喺平民日常生活社區，突然有間唔起眼食店外面有一堆堆人，又唔係排隊喺度做乜? 等外賣囉。上網睇下，原來呢間小店 Tuang Dim Sum by Chef Yip嘅港式點心已俘虜唔少點心愛好者。喺門口裝到葉師傅好專心主理點心蒸/炸工作，啲哥哥/姐姐仔穿梭廚房同店面安排客人入座同外賣，堆到山仔咁高嘅點心籠冒出縷縷蒸氣。此情此景，忍唔住攞張點心紙睇吓，價錢由10銖至55銖，然後就不由自主咁係咁剔咗14樣(！)點心。交咗點心紙俾哥哥仔，喺等點心期間偷窺師傅做嘢，友善嘅師傅都冇介意，原來師傅識廣東話，好彩我哋冇大言不慚，講啲乜嘢不敬說話。雖然人多柯打多，但等咗十五分鐘就到我哋啦，拿拿聲返屋企開餐。

炸物係絕對出色，返到屋企仍然係脆到出奇。我至愛嘅芋角，外層酥脆，餡料係軟糯芋蓉，下次要叫多啲唔駛爭。流心奶黃煎堆仔(芝蔴球)係驚喜，又係外脆內軟，仲要係真·流心。馬拉糕充滿空氣感同黑糖獨有香味，比起元朗大xx有過之而無不及。其他蒸點心例如蝦餃燒賣都尚算有水準。睇返個價錢，食得更開心。兩個人食咗14樣點心，都只係412銖。唔好誤會哈哈泰泰本身食量，我只係抗拒唔到點心咋。

由於店面座位唔多，唔想等太耐，都係外賣穩陣啲。橫掂就算外賣，啲點心都冇失色。之後我哋屋企開party ，用葉師傅點心招呼朋友，佢哋都好開心咁鯨吞，瞬間清碟。

翻查資料，原來呢位葉師傅係來自曼谷香格里拉酒店嘅點心部。而家大隠隠於市，真係禾稈冚珍珠。

題外話，抱歉冇太多食物相，因為掛住食。