「住加第1卡」你要知！ 移民加拿大🇨🇦，係你嘅下半生嘅開始，必然會接觸呢張「住加第1卡」，就係
加拿大永久居民卡Canada Permanent Resident Card，喺一眾移民顧問口中嘅「楓葉卡」，是作為「加拿大永久居民」嘅身份證明文件，亦係各位移民時最期待嘅目的！
呢張PR Card其性質類似於美國嘅「綠卡」，同香港嘅3粒星身份証一樣。 早期喺加拿大係使用「移民紙」嘅，而PR出入加拿大境時就只靠「Honest System」去申報離境嘅日子，當年好多太空人兩邊走，為求可以足夠嘅日數，所以喺申請入籍時都係虛報留加時間，加拿大政府有見及此為咗堵塞呢個漏洞，所以用楓葉卡去紀錄PR出入境嘅狀況。 再加上喺911恐襲事件後，由於「美加」嘅邊境係全世界上最長嘅不設防邊境，喺美國政府嘅提議下，加拿大政府於2002年6月28日起開始對加拿大永久居民簽發足以證明其個人身份嘅楓葉卡。
究竟各位準備過嚟加拿大Land嘅時候，點先可以拎到呢張「加拿大永久居民卡」呢？ 「楓葉卡」只能喺加拿大境內申請，其實好簡單，只要各位坐飛機入境加拿大時，喺入境加拿大嘅入境口岸，其中有個櫃位係專門俾過嚟Land嘅新移民，跟住小小程序去做，入境官員會問下你D問題等等，但各位新移民最重要係提供一個加拿大嘅地址，而張楓葉卡最終係會寄去你呢個地址！ 咁你又會心諗，係咪人人都喺入境前就已經隔山買定樓或租定屋先？如果唔係，又何來會有個收件地址先？ 無錯，可行嘅情況如下：
- 喺出發前早早已經上網買咗樓(托人幫你睇樓及收樓)
- 亦都係喺網上搵定租住嘅地方(例如：Airbnb)
- 如果咩都未做，但有熟朋友可以借出佢個地址去幫你代收
- 如果喺入境時最終都係未可以提供合適嘅地址，新移民則需要喺180天內電話通知加拿大移民部（CIC），電話號碼18882422100，呢個電話號碼只 可以使用加拿大境內嘅電話撥打，美國及任何其他國家嘅電話都無法撥通此號碼。到時更新番你個新地址便可以 但如果未能喺新登陸時申請「楓葉卡」，咁就需要重新嘅申請程序，以及額外嘅CA$50申請費用。 喺正常嘅情況下，新移民登陸到收到楓葉卡嘅時間大概為 67天，延期楓葉卡嘅時間大概係5個月到8個月不等。 最後，加拿大嘅PR係要喺五年內住夠730日先可以保留PR嘅身份，住唔夠時間IRCC有權取消嗰個人嘅PR資格，呢一點係好重要及需要好清楚，唔係拎到PR就可以無條件咁Keep住個PR身份架！緊記！緊記！ 記住自己嘅留加日數呀！ 千奇唔好大頭蝦計錯數衰收尾呢！ 大家就要自己考慮一下及準備一下喇！ 唔算複雜，唔係難搞，大家要順順利利呀！ 如果各位覺得今篇分享係幫到手，有用嘅話，記住幫手俾個Like，以示鼓勵，與此同時可以按分享，俾更多人知道，希望可以幫到更多朋友！
多謝支持！
住加港爸移民日記 #住加港爸 #移民 #移民加拿大 #加拿大移民 #加拿大 #住加第1卡
鳴謝網友Karl不斷提供更多資料，以便更詳細咁更正此資訊！🙏🙏
呢篇文章由 住加港爸移民日記 提供，記得follow返人呀～～ https://www.facebook.com/HKerInCanada/
