入鄉隨俗篇 - 買車（連車保）小貼士

因為真係好忙，網絡遷徙未處理，連分享都停左落黎，今晚靜靜地，希望可以長話短說，講重點，希望幫到大家之餘，改到我長氣的習慣。

Mewe link我雖然放左出黎，不過只係一個Mewe group chat，我會將呢度的分享C&P入去，亦會用真名寫下平常事，大家有咩問題都可以於Mewe group chat問我。

前幾日講過香港車牌換英國車牌我的擔心，今次再講下英國買車同買車保的小貼士。

買車 好多人（包括我）買車一定睇車價啦，點知，我錯了，因為好多時去到買車保先發現保費好貴，點解保費貴呢？除左因為英國路面經驗不足外，最主要係個車款出過事。

1️⃣英國保險公司將所有車輛分為50個group，1-50，最低為1最高為50，越低組別即係越安全，除左我地認識的牌子，引擎排氣量，車的效能，意外率，維修費高低外，最重要係偷車率，無錯，越大機會被偷的車保費亦都會越貴；所以唔好諗一架簡單的VW Golf的保費一定平，唔好意思喇，呢款車係偷車排行榜有名架，所以排到去Group 36-40，即係要預多粉少保費同車的保安喇。

2️⃣咁既然香港牌齡同NCB都唔多點認，係咪即係唔駛攪呢？又唔係喎，根據住左英國比耐的網友就話，雖然頭兩年的車保預左貴，不過去到第三年，保險公司會考慮埋香港駕駛經驗及香港的NCB，所以半年後大家換車牌時一定要交埋TD320，睇清楚張車牌有無相關的資料，而買車保時有無Protect到自己的NCB同俾埋香港車保公司提供的NCB record。

3️⃣好多人買車都問架喇，日本車好唔好？定係歐洲車爽D呀？品味的野見人見至，不過可以補充的係，最近因為脫歐的關係，英國政府同日本政府簽左份協議，日本汽車零件會超低稅率運到英國，即是話之前成日有人講「日本車雖然好不過零件貴」呢件事無左喇，而大部分英國日本車都係歐美甚至英國造，設計都執過，所以今日的日本車有得諗架。

4️⃣汽油？油渣？混能？全電？香港揸油渣車就平好多，不過英國的油渣同汽油真是差唔多價；另外，最近英國政府都宣布，目標2030年後就唔再出售純汽油同油渣車，所以混能同全電動車都會開始熱鬧；最後一提的係，倫敦的入城費，暫時全電車係有豁免收費。

至於車保方面，已經有唔少KOL介紹過，我亦唔多講，我主要提兩點，📌第一，真是唔好為左少少保費去執自己報的資料，保險公司有咩事一定去查，查到咩一定賴，甚至攪到虛假陳述影響其他重要事就麻煩；📌第二，就是好多時保險公司都會提供一個所謂黑盒的野去check大家駕駛習慣，當然有少少保費減免，大約平100磅左右啦，呢個野我都有裝，頭3個星期都會好低分，因為未有咩數據支持，之後就會陸續加分，每十日左右就會俾次分你，大約3個月後就一個月一次分數，第一個分係駕駛技巧，之後係駕駛環境，最後係駕駛時間；整體上我都覺得中肯，提下我加速減速，落雨落雪的習慣，就算Lockdown開車時間亂晒都無咩影響分數，如果唔怕俾人追蹤駕駛習慣的話，我就覺得無咩問題，平少少都好。

最後一樣，為左安心，我都建議大家買個軚盤鎖，車賊一定捨難取易，多件野阻住佢一定諗多兩諗先做野，希望大家車路亨通出入平安。

以上文章由追追趕趕 跌跌蹱踵在英倫提供： https://www.facebook.com/107796820835299/posts/243783373903309/?d=n