作為一位華州居民兼行山客，完全唔介紹雷尼爾峰(Mt. Rainier)就好似講唔過去。忍咗手咁耐，今次就用多少少篇幅同大家講吓筆者眼中嘅呢座地標。

位於華盛頓州嘅 Mt. Rainier 係美國本土最大火山，亦係世界最危險活火山之一。山高 14411 呎，比美國本土最高峰 Mt. Whitney 只低唔夠一百呎。但係由於緯度北好多，山頂長年冰雪，係本土(除阿拉斯加外)擁有最多冰川嘅獨立山峰。呢座高山非常觸目，因為所屬盆地平坦遼闊，只要天氣夠好，你就可以喺附近大城市嘅市區道路上直接見到佢。而由西雅圖揸車去 Mt. Rainier 只係需要大概兩個鐘車程，每年都吸引唔少觀光客。

Mt. Rainier National Park 總共有三個入口： 南面入口 Nisqually Entrance 經 Longmire 去到 Paradise： 呢個入口係唯一一個全年開放嘅入口，公共設施亦最多。外地嚟嘅遊客建議先撿呢度進入遊覽 (https://maps.app.goo.gl/9PwLvkMDewbX9yNq5) 東面入口 Sunrise Entrance 去到 White River Campground 同 Sunrise： 呢個入口只會夏天開放，通常係七月至九月中，都好有佢嘅特色，但係停車場相對細好多，經常會爭崩頭 (https://maps.app.goo.gl/3KMhWc1ybPSXEwmN6) 西北面入口去到 Mowich Lake： 呢個入口都係夏天至初秋先開，通常係七月中至十月頭。佢嘅入口前有一段幾長同崎嶇既 Dirt Road，而 Mowich Lake 除咗個營地都冇咩其它設施，所以唔建議新手去喇 (https://maps.app.goo.gl/JNyuGaSp5LWMvtJb8)

㊣行山徑推介㊣

Skyline Trail Loop： 全長 5.5 英哩，總攀升 1450 呎，係 Paradise 最經典行山徑，必去！全程可以近處多角度睇到整座 Mt Rainier、冰川、瀑布。天氣好時仲可以見到遠處其它雪山 Mt Adams、St. Helen 甚至 Oregon 嘅 Mt. Hood。最佳遊覽時間係七月底至九月去行。

Fremont Lookout： 來回 5.6 英哩，總攀升 1200 呎，係 Sunrise 最靚行山路線之一。主要景色係由北面睇整座 Mt. Rainier，夏天夜晚仲可以見到銀河添！天氣好時可以見到北面嘅雪山，包括 Mt. Baker。

體力唔夠嘅遊客就算只係揸車去到 Paradise 或 Sunrise 嘅遊客中心，係附近行吓，都可以飽覽 Mt Rainier，順便坐低啤一啤(遊客中心有售)。

另外，除咗普通觀光同行山客，Mt. Rainier 亦係美國攀山(Mountaineering)訓練營嘅集中地。事關呢度可以話係美國唯一一座擁有各種唔同高山地形挑戰，同時又近大城市嘅山峰。好多準備要去攀珠峰等高山嘅攀山者都會喺呢度進行特訓，山腳亦有機構長年舉辦各類攀山課程。時不時你都可以見到帶住頭盔、繩索、冰斧等工具嘅攀山者係 Paradise 出現。

要注意嘅事項：

由於近年越嚟越多遊客，Mt Rainier 今年起改例，都需要預約進入喇。譬如你想七月去遊覽，最好就係四月一號預約 Book 左位先，八月至九月嘅遊客就係五月一號開始預約喇。詳情請參考官網： https://www.nps.gov/mora/planyourvisit/timed-entry-reservations.htm

講咗咁多係時候貼下相。呢次嘅相係包括 Skyline Trail、Fremont Lookout、Mowich Lake 嘅 Tolmie Peak Lookout，同埋當年去進行攀山特訓途中同真正攀上山頂嘅相片。