芝豬漫活回憶錄 第一回 By 芝城莫文胃

有人成日都話芝加哥無好西食, 其實我好想為佢平反下。芝加哥係曾經喺2017年擊敗 New York 成為 Best Restaurant City 㗎. 喺創意美食入面佢係世界級, 只係無你地思香時嘅魚蛋燒賣。就講呢間紫豬 Purple Pig 嘅創意Tapas, 贏獎贏到開巷, 由2011開始已經係米芝蓮寵兒, 唔比人book位, 非常有芝加哥式嘅傲嬌~

上次文胃試過一次, 有驚喜! 首先講下個menu 竟然有豬耳豬脷豬頸骨。不過文胃唔係好喜歡啲咁有型嘅部位, 所以揀咗Berkshire shoulders, 再要咗個Halibut 同甜粟米超寬條麵, 同最最最令文胃感興趣嘅potato ice cream 做頭盤.

個Berkshire同Hallibut 都好正路, 但唔可以話太驚喜, 所以唔講太多。

🌽粟米係美國中部特產, 十級甜, 用嚟做意粉醬唔heavy, 食完無好滯嘅感覺～ 喺其他地方我未見過, 所以有驚喜 🤩🤩

🥔然後呢個potato ice cream, 我一開始話想order嘅時候都比人鬧我嘥錢, 不過一上枱, 占師奶眼神閃咗一閃, 之後呢味菜就成為全晚亮點。

首先呢味菜嘅玩味甚濃, 佢唔係甜品係頭盤, 大有dessert before dinner 嘅寓意。咁到底佢係咸定甜架呢, 答案係香滑微甜加咸香加冰火二重天. 喺一小羮冰凍Creme fraiche 之上有一幾粒咸香魚子醬, 然後每一塊熱辣香脆嘅薯片上面有一啲非常清新嘅醬. 你將佢哋分開食係無乜特別, 但係撈埋一齊食又出奇地夾, 好L好玩. 佢未上枱前嘅期待到食完之後都充滿話題性, 令文胃渡過咗一個好愉快嘅晚上...🤓🤓🥳🥳

—————— 🦁筆者的話

喺呢個呼吸都有害嘅年代, 食訓玩嘅芝豬生活雖然已成過去, 但係回味下以前嘅美食日記都未償為過, 就當係精神食糧, 希望為大家捱過呢個漫長嘅芝加哥寒冬！