材料： 新鮮意粉180克 蛋黃兩個 蛋白一個 洋蔥（小）一個 蒜頭半顆 煙肉四片 真·牛油一片 白餐酒兩湯匙 黑胡椒粉少許 鹽之花（Fleur de salt）少許 意大利初榨橄欖油少許 放左工懶洋洋唔知煮咩好？來個15分鐘速食，好過你煮公仔麵！
- 煲1公升水（想快就用電水壺啦）、開平底鍋（中火）在鍋上澆油
- 同一時間，洋蔥切粒，蒜頭切蓉
- 把切好的洋蔥放進平底鍋，由它煎至金黃色
- 同一時間，切煙肉、蒜蓉
- 洋蔥煎至金黃色時，落蒜蓉、煙肉、黑椒再炒
- 落1-2茶匙鹽到已水滾的鍋、落意粉，煮三分鐘
- 同時間落白酒到平底鍋，再炒
- 時間到，將意粉取出，平底鍋離火，把意粉倒進平底鍋，加入蛋黃蛋白搞拌
- 上碟後，淋上少許初榨橄欖油、灑上鹽之花、黑椒碎即成！
如果係專業師奶，其實十分鐘就煮好。呢個偽·卡邦尼意粉，食嘅係蛋香、鹽香同橄欖油香，所以唔落芝士亦唔落奶，以免影響食材的鮮味。 都係嗰句，鹽之花係一種犯規級別的食材，煮完意粉、海鮮等等在上面撒一點，整碟菜就畫龍點睛，是到法國旅行必定要購買的重點食材。至於意大利橄欖油的香醇，各位老饕也懂的，我就不冗述了。 這道意粉的主角是雞蛋，沒錯，是生雞蛋啪落去撈的，英國上個月剛宣布，全國所有雞蛋都可以安全生食，所以我就不客氣了。什麼？怕生？怕生你去食揚州炒飯啦，放過隻靚蛋啦施主～ 最後提提大家，鮮意粉和乾意粉不同，鮮意粉要放雪櫃，只需兩三分鐘已經會熟，而且本身成份也有蛋（一落水就會好多泡），所以配搭起這些食材，更是相得益彰。
呢篇文章係轉載自 倫敦人妻先生手記 記得follow 埋人哋呀～^_^ https://www.facebook.com/mrwifelondon/posts/515566585489603
