喺香港大嘅我地，自然係對茶餐廳的早餐，有講唔出嘅感情，或者，係一份份嘅回憶，包括係細個嘅時候，爸媽帶我去食，跟住係同自己朋友去食，然後係出嚟做嘢之後返工前去食，又之後同男朋友去食。一句到尾：我諗係同大家經歷應該相似，係一份文化同回憶。 嚟到悉尼之後，慨歎嘅係: 1) 港式茶餐廳唔係處處搵到 2) 無廚X牌腸仔 3) 無X妹牌火腿 4) 價錢應該貴過香港(註: 但過往經年香港物價指數不斷漲, 澳洲就比較穏定，所以都唔係貴好多) 5) 粥餐嘅油炸鬼通常唔係好新鮮 6) 唔係間間都有滑腸份 7) 艇仔粥— 可能香港嘅艇同澳洲果啲唔係一樣（人地滑浪同獨木舟，唔知有無影晌），個味呢，嗯，佢唔講你唔知佢叫「艇仔粥」咁咯 8) 無碎牛肉粥 9) 無乜見過有麥皮餐喎，雖然我都唔會揀 10) 香港有Ａ—Ｄ餐，仲有常餐甚至特餐，呢度呢，搵到有Ａ餐已經好開心 11) 唔係間間啲奶茶都好味，可能出去飲杯意式咖啡無咁嬲 12) 唔係間間有我鍾意飲嘅杏霜 13) 唔係間間用坑紋通粉 14) 啲白麵包硬係唔係好軟，笨笨的，實實的（ＬＯＬ） 15) 無見過有五香肉丁米／麵／通 16) 叉燒湯意通常嚿叉燒好似減緊肥咁 17) 最重要係，佢地唔會開得好早，九點就己經好好，有啲開十點或十一點，唉！

不過，都有啲好嘢嘅： 1) 我覺得啲蛋好食啲 2) 如果個餐係牛扒蛋餐，通常嚿牛扒，喺正常情況之下都會好食過喺香港果啲 3) 地方通常乾淨啲

我時不時都去茶記，搵返啲靈感寫稿、諗電台節目內容，同埋當然係醫肚。 去咗咁多間，個人覺得呢間係最似香港嘅，因為佢嘅選擇問題，Bonus係佢平過某幾間。 我時不時都去搵Ａ餐賜我力量，偶爾搵特餐放縱一下，一個牛扒蛋餐應該會飽到晚上，$16.5飽兩餐，夫復何求?!

開放時間: 一至四: 0900-1700; 五至日: 0900-2100