英移嘅小朋友👦🏻👧🏻，將要面對全新嘅學習環境，或多或少都要啲時間適應。如果能夠盡早掌握課程同考核模式，絕對可以為小朋友減輕學業壓力。 相信大家都見過一啲學校排行榜📊，呢啲排行榜都有利用一大堆參數，配上學生表現及成績，為學校形成評分及排名。你估，啲學校緊唔緊張？ 千祈唔好以為喺英國讀書就冇壓力，其實一樣有唔少競爭，想要好成績，壓力唔會比喺香城細。Tutoring（補習）係課堂外都好盛行嘅助力，lock down 噤耐，Tutoring都由上門轉晒做網上，Tutor們都 work from home。網上世界，無遠弗屆。

之前另一篇文章【地理課】都提過，一般公立及政府資助學校，由council安排，以居所與學校距離為收生標準。由於按學生居住地址為準，鄰近質素不俗學校嘅房產不論租與買，都有價有市。 你揀人，人揀你。質素更高嘅學校，會希望主動揀選更好嘅學生，維持或甚至提高學府成績及聲譽。好自然就要有額外嘅評審手段，而呢個就係11+ (Eleven Plus)。

呢一類中學，稱為 Academic Selective School ，唔少係私校，又或者係領公帑嘅Grammer School等，如果小朋友想Year 7 入讀，11+考試通常都走唔甩。不論政府資助或私校，只要學校於新學年剛開學不久，為來年升Year 7 申報學生，舉辦評核考試，該評核考試統稱為11+。換句話說， 2021年9月 Year 6開學嘅小朋友，9月冇耐就會參加11+考試，接續一連串選拔，獲取錄後於2022年9月升中學 Year 7。 雖然11+現時唔係一個全國性嘅規範考試，但「市場」仍然相當有規模，Wiki 話現時喺英格蘭有163間Grammer School仍然應用11+考試，加上各地嘅私校，可見其實應用得頗廣泛。

另一點要提提大家，有部份地域會將11+納入為區域性升中評核試，預設當區學生會參與；學生反之可以提出不參評，隨當地council按離學校距離派位。幾個耳熟嘅地域包括：大倫敦入邊嘅 Bexley、Kingston、Sutton、外圍嘅Kent、Reading、Buckinghamshire、大曼徹斯特入邊嘅Trafford、利物浦入邊嘅Wirral等等。如果會考慮將來在呢啲地區落腳，升中前要參加11 +。

本篇粗略介紹過11+來由，續篇會簡介4大考試範疇。附圖為港孩11+操練工具🙃 In Your Area 網站 頭10位公立中學 State Secondary School 2019排名 https://www.inyourarea.co.uk/news/top-10-state-secondary-schools/?fbclid=IwAR1yOoibOUpUujOIdNIOW1na6ueNbpTHRpE8Rgbvxf9pvzsmB1byLFbzrgA

呢篇文章由以下 英移求學會 提供，記得follow返人呀～～ https://www.facebook.com/英移求學會-100639575228101/