話說今日華州野外露營許可大抽獎公佈結果，筆者好明顯...又冇中！但係因為筆者好樂觀，見到今年可以去其它州玩嘅好處，所以都只係「由治及興」咗佢半日咁啫＃＆＊※§
今次就向大家介紹呢個美國最難攞野外露營許可嘅地點：華盛頓州嘅 The Enchantments 入口 Stuart And Colchuck Lake Trailheads: https://maps.app.goo.gl/6Bc2SANaDareSM2X7 出口 Snow Lakes Trailhead: https://maps.app.goo.gl/dco5nWMA9VUUnPms8
位於西雅圖以東大概兩個鐘車程，德國村 Leavenworth 附近，係屬於稱為 Staurt Range 嘅山區。呢度有好多 Alpine Lakes，風景一流，雖然係冇被正式列為國家公園，但其實都係由聯邦政府管理，曾經算係華州嘅 hidden gem 之一。但係由於近十年知名度大增，政府設立嘅野外露營許可上限每年都爆滿，就算抽籤都機會渺茫。筆者今年係第三年抽，但就聽過有人已經抽咗十二年都未中...... 關於詳細嘅 Backcountry Permit Lottery 資料，大家可以參考官網： https://www.fs.usda.gov/detail/okawen/passes-permits/recreation/?cid=fsbdev3_053607
咁除咗野外露營呢個選項外，都仲有一個可以體驗整個 The Enchantments 風景嘅途徑嘅，就係一日行晒佢。呢個選項雖然都要 Permit，但係冇 Quota，去行當日攞就得。但係一般人都唔會咁做，因為整條 The Enchantments 行山徑有成二十英哩，總攀升四千幾呎，冇咁上下體力訓練都唔得啦。又加上其中會經過近十個冰川湖泊，風景咁好，趕鴨仔咁行過其實係好浪費嘅一回事......
當然喇～筆者就並唔係一般人，而係比一般人更悲觀嘅 LOONG 友。覺得以自己嘅抽籤運，只會等到菊花也謝了。所以唯有扚起心肝鍛鍊自己，就喺舊年夏天，孭住相機同鏡頭單日長征。雖然自問都有 LONG LONG 的腳，但結果係由朝早四點幾行到傍晚七點，所以喺家中嘅老中青小朋友冇練過就千祈唔好學喇。
呢度都有少少貼士俾大家嘅：
- 去玩嘅最佳時間係七月尾至九月尾。根據每年情況唔同，高處嘅行山徑喺七月頭都仲有機會有好多冰雪，除非你有特別攀山工具同技術，唔係都係等大部份冰雪融咗先去好啲。
- 上半段（嚴格嚟講頭八英哩）最難。大部份體力都預咗要用係攀上 Aasgard Pass 嘅路線上，呢條路線係好多大石，經常要手腳並用，路線指示要靠搵 Cairn，並唔係好明確，如有混淆要盡量靠左行。
- 頂部 The Core Zone 風景最靚，如果時間夠用就盡可能留耐啲。
- 呢個山區嘅野生動物最多嘅係山羊，熊其實唔係咁常見，但啲山羊其實可以好兇狠，尤其要保護羊咩仔嘅時候，都係要保持距離㗎。
- Trailhead Parking Lot 先到先得，係要俾錢停車嘅，但係如果你有 America The Beautiful 嘅 Annual Pass 就可以免費。
- 體力唔夠嘅朋友都可以選擇由入口行到 Colchuck Lake，影完相打完卡就原路返轉頭，總長度 8 英哩攀升唔大，會比較適合一般遊客。
講咗咁多，都係時候俾大家睇吓舊年影落嚟嘅相，跟住筆者又要等待出年二月再抽過簽喇...
