平民美食 Guay Jub Mr Joe 連續多年得到米芝蓮推介。聽落以為老闆係西人Mr Joe 賣西餐，原來係屹立曼谷幾十年嘅泰式潮汕粿汁專門店。如果你唔係潮汕人士，粿汁就係胡椒豬雜湯加卷狀河粉嘅潮汕麵食。由於舖頭門口永遠有堆人等緊外賣，令人更期待裏面嘅美食。雖然冇冷氣又冇富麗堂皇嘅裝修，但坐位濶落，環境乾淨，好有泰式親切感。落單阿姐/哥通常一睇就知我哋唔係泰國人，都會好貼心為我哋遞上圖文並茂英泰對照餐牌，點菜冇難度。

能成為哈哈泰泰嘅comfort food，當然有原因。胡椒湯底粿汁有勁道；豬雜炆得又淋又入味，仲可以自選邊個部份；燒肉皮永遠脆卜卜，每次都要另外叫多一碟先夠。粿汁一律一碗70銖，燒肉一碟60銖。絕對嘅平民美食，非常受本地人歡迎，所以冇需要為遊客而改變，咁樣大家先可以食到原裝泰式風味。

題外話，其實哈哈泰泰未移居曼谷前，係未食過粿汁嘅，正一大鄉里。

Guay Job Mr Joe 86 Soi Chan 44, Bangkok, 10120, Thailand (近Asiatique, BTS Saphan Taksin站)