位於Phrom Phong 嘅Emporium / Emquartier 大家可能去到熟曬，亦知道附近有條街Sukhumvit 33/1 Alley 有好多日本人出沒。短短一條街有多間日式餐廳、咖啡店、超級市場、藥房、麵包舖、書店等等。無論係咪日本人，都好容易會不經不覺咁，喺呢條街仔蹓躂咗半日。

近大路有一間蕎麥麵屋 Azuma (あずま生そば) 係本哈經常幫襯嘅。雖然主打係蕎麥麵，但係選擇相當豐富，蕎麥麵同麵汁都可以揀冷或者熱，主食配搭多姿多采。大部分定食價錢都係介乎二百至三百泰銖，最抵食就係蕎麥麵加丼飯定食。就算咁多日本人幫襯，都係收平民價錢，抵讚。呢度令人感到最最最窩心嘅，就係佢地非常尊重唔同嘅客人有唔同食量，客人可以選擇定食配以一份至三份蕎麥麵，收費都係一樣。咁樣就唔會造成食物浪費，要幾多，嗌幾多，食得晒，先好嗌。

今次我哋叫咗人氣榜第一位同第二位嘅豬扒蛋飯定食同埋炸蝦天婦羅定食，配冷蕎麥麵。為咗配合聲稱減肥嘅哈友，正常嘅本哈，同埋再發育哈少嘅食量，分別柯打左一份，兩份同埋三份蕎麥麵。大家睇相可以見到三個蕎麥麵份量嘅明顯分別。

Azuma標榜店內即日製造蕎麥麵，麵質爽口彈牙，配以清爽嘅麵汁，其實可以淨係食麵都大滿足。但係貪心係人嘅本性，美食當前唔會執輸。豬扒蛋飯用日本米，豬扒新鮮即炸，落咗蛋汁都一樣咁鬆脆。天婦羅都係即叫即做，炸槳薄，蝦新鮮，no complaint 。食飽飽之後，侍應仲會跟足傳統，送上淥麵水，用嚟溝埋剩低嘅麵汁當湯飲。

肚皮飽飽心情好好，拎住大包小包，超級市場買嘅雜貨，同日式麵包打道回府。都話喺曼谷食日本菜係定律㗎啦。