相信大家都唔會對藍象呢個品牌感到陌生，佢哋嘅泰式醬汁同埋香料，係最受香港人歡迎嘅手信之一。藍象位於曼谷嘅本店除咗有全線產品發售，仲有烹飪學校同餐廳。座落BTS站 Surasak隔離嘅黃色大屋，係擁有超過百年歷史嘅法定古蹟，前身係中泰商會，有極濃厚殖民地色彩，加上悉心配合嘅裝潢，集合品味同保育於一身，散發馥郁懷舊氣氛。令哈哈泰泰不禁聯想到香港嘅中國會同埋唐人館。

藍象餐廳唔係標榜地道正宗泰菜，反而開宗明義將不同泰國菜式調節，以迎合世界各地食客口味，從另一角度推廣泰菜。哈哈泰泰作為一個外國人，正正就係被呢種異國風味一再俘虜。

藍象不論服務水準，食材質素，菜式研發，餐酒藏量甚至背景音樂都令客人感覺被重視。難怪佢哋連續多年成為米芝蓮指南餐廳。

餐廳本身設有tasting menu，每位THB2,200。不過哈哈泰泰通常都睇餐牌點菜，隨心啲。炸蝦餅係尋常百家食品，但藍象做到外層酥脆，蝦肉保持濕潤，加上獨特甜酸蘸汁，幾怕熱氣都要食。牛尾煲用大量香草加紅酒燴煮，泰西合璧，一流comfort food。個人私心最鐘意椰汁雞湯 Tom Kha Gai，加椰減酸，南姜香茅突出，齒頰留香，拒絕分享。(押韻!)