可能因為冇咁嚴重嘅(萬能key)土地問題，曼谷嘅戲院一般都更有條件，做到以客為先嘅設計。以前喺香港，入戲院純粹係為咗睇某一齣戲，但係而家喺曼谷入戲院，係享受光與影嘅完整體驗，對哈哈泰泰嚟講係一個event。

例如昭柏耶河畔嘅Icon Siam 裏面嘅Icon Cineconic，係曼谷現時為止最新最大嘅戲院，亦深得哈哈泰泰歡心。踏入有氣勢又美輪美奐嘅大堂，見到1:1比例經典電影人物Figuressss，已經令人準備好進入電影世界。去到小食counter前，每次都選擇困難症發作，到買咗小食同飲品準備入場之際，哈哈泰泰都好享受坐喺水晶燈下嘅等候時間。精緻典雅嘅等候區往往令人聯想到傳說中二十世紀喺銅鑼灣嘅碧麗宮。

新戲院嘅好處係座位同埋影音質素都可以做到最先進，最多選擇，務求滿足唔同觀眾嘅要求。票價更加係哈哈泰泰入戲院嘅催化劑：

Regular THB280 IMAX THB350-400 4DX THB500-600

要留意嘅係，泰國戲院播放外語(包括英文)電影往往只有泰文字幕，對哈哈泰泰嚟講係一個好好嘅英文聆聽(強力)訓練，聽得幾多得幾多，藝術無疆界，永不言棄。