「泰國除咗泰菜(一定)正，日本菜都係必食好食又抵食！」

以上並唔係信口雌黃，亦唔係香港人哈日情意結，而係來自唔同國家居泰朋友嘅共識，大家仲不時互相交換日食情報，確保人人食到好嘢。喺曼谷嘅日本僑民集中喺Thonglor 一帶居住同活動，嗰度啲日本餐廳多不勝數，有時去到某啲橫街，真係有時空交錯感覺，幻想自己喺東京某條街仔。餐廳為咗確保服務同食物質素，唔少都聘用日本人主廚，有規模嘅甚至會由日本原店派駐管理團隊。可喜收費仍然係泰國價錢，所以而家我哋食日本嘢嘅密度，係高過喺香港。

Miyazaki Teppanyaki 宮崎鐵板燒係其中一間充滿驚喜嘅日式餐廳。佢哋本身係有好幾間分店，我同師奶仔朋友們就鍾意嚟Thonglor 店，地點方便，環境清幽，又坐得闊落。嚟到通常會坐吧枱，可以睇住廚師烹飪，妄想學下嘢。望望餐牌，價錢有少少令人不能置信，lunch set 最貴係紐西蘭西冷@215銖！雖然唔係full course 和牛鐵板燒，但咁嘅價錢有廚師即席烹製，包麵豉湯、西冷牛扒、炒野菜同炒飯，有service，抵過去連鎖店食漢堡包。當然晚餐時段價錢會唔同，但貴唔得幾多，最貴嘅龍蝦set 都係799銖。

我落柯打要西冷三成熟，廚師做到冇over cooked，剛剛好；炒菜份量慷慨又夠爽脆，炒飯乾身粒粒分明。食飽飽開心又滿足，轉身去附近日本超級市場買餸，為自己製造一個和風下午。

要數曼谷日本餐廳，個list 好長，有排講。大家唔好咁快打呵欠。