聖誕係奇妙嘅，無論你身處何方，全球五大洲，北半球定係南半球，熱帶定係寒帶，而家無論係夏天冬天，聖誕都會降臨，連繫人心，送遞溫暖，撫平心靈。

雖然喺泰國唔會有白色聖誕，但係不論外國人定係本地人，都非常重視呢個日子賦予嘅意義，同至親一齊渡過溫馨時光。因此好多聖誕嘅傳統節目，都可以喺曼谷體驗到。哈哈泰泰日前就去睇左聖誕傳統劇目胡桃夾子芭蕾舞劇，提早為慶祝聖誕揭開序幕。

芭蕾舞劇演出地點係泰國文化中心。乘坐MRT喺泰國文化中心站落車，徒步10分鐘就到達，非常方便。泰國文化中心建築群以傳統泰式風格建成，全部呈現經典三角形屋頂，非常有氣勢。加上精緻優雅花園設計，提昇整個theatre going 氛圍。

今次芭蕾舞劇嘅首席舞者係波修瓦芭蕾舞團Bolshoi Ballet嘅Kristina Kretova 同埋Igor Tsvirko ，令人熱切期待。主辦單位Russia Multimedia Theatre of Ballet，以多媒體睇技術加入傳統舞劇，一新耳目。整個表演流麗奪目，觀眾(即係哈哈泰泰自己)投入其中渾然忘我。返到屋企仲loop咗胡桃夾子組曲好幾次，希望將剛才嘅表演深深烙印喺腦海中。

期待越嚟越濃郁嘅聖誕氣氛，同埋下一次再嚟文化中心睇其他表演。