哈哈泰泰份人為食又八卦，身處泰國，當然希望體驗多元化嘅美饋，對呢個地方有更立體嘅了解。雖然坊間都有唔少爭議，但米芝連推介某程度上提供一個幾方便實用嘅指引，俾食客可以按自己嘅要求揀到心水餐廳，大快朵頤。

Restaurant Suhring 連續多年得到米芝連二星認證，實力無庸致疑。但吸引到哈哈泰泰嘅係德裔孖仔大廚 Thomas 同Matthias嘅誠意。佢哋將坐落曼谷市中心建於70年代嘅花園大屋，改裝成為餐廳，將用餐區分為「廚房」、「冬日花園」、「客廳」同埋「飯廳」；並且將佢哋家族流傳嘅食譜改良成為創意料理。整體概念係邀請朋友去佢哋屋企食引以自豪嘅住家飯。呢種獨特用餐氣氛同體驗係一般豪華餐廳未必有嘅。

食飯當日，哈哈泰泰特登喺未日落嘅時候就到達，欣賞花園大屋日與夜嘅美景。果然，連洗手間門口都充滿詩意。食物質素同服務當然係世界級，有相為證，不贅，大家慢慢欣賞。

晚餐五道菜THB5000，八道菜THB6500。哈哈泰泰計過師奶數，覺得八道菜抵啲，結果由頭殼頂飽到落腳趾尾，以後記住要量力而為。

溫馨提示： 喺泰國嘅入口洋酒一般比香港貴三成，但係喺餐廳嘅mark up 又冇香港咁高%，所以拉勻嚟計，喺餐廳叫酒飲係抵過買酒返屋企飲。（嘻嘻，其實都係俾藉口自己開酒。）