維多利亞市位於溫哥華島南端，佢並唔係最熱門嘅移民城市，但係今次訪問嘅地膽就對佢情有獨鍾一住上癮。佢恬靜純樸嘅生活同香港啱啱相反，令到好多新移民錯愕。當移民生活唔係想像中咁鳥語花香嘅時候，可以點面對？有啲咩生活文化上嘅時差係大家諗都無諗過㗎呢？

你搬咗去加拿大幾耐? 點解會揀維多利亞而唔係溫哥華或多倫多呢啲多香港人嘅城市呢？

1987年我同屋企人正式舉家移民到加拿大嘅維多利亞。因為婆婆本身係喺Victoria出世，所以好自然就跟隨婆婆喺呢度定居，我就好鍾意佢嘅簡樸恬靜, 生活上都好習慣。反而對上一次返香港(2017年）比我嘅感覺就係好大壓迫感，成日都好似俾人推住走咁。覺得生活上嘅節奏好唔同，絕對有生活上嘅 jet lag。

既然你喺海外生活咗咁耐，建立咗自己嘅生活與世無爭，點解會突然接觸到咁多香港新移民㗎呢?

2019年香港發生抗爭，我開始留意香港新聞，然後有一日我喊住同我老公講香港淪陷喇😭😭然後我就喺Facebook follow咗個加拿大香港人嘅group，然後又無意中發現咗溫哥華街坊會，喺個會入面認識咗少數喺維多利亞住嘅香港人，跟住識咗之後就盡自己嘅少少綿力幫一啲啱啱落地嘅人做吓司機，做吓盲公竹帶佢哋去grocery shopping囉。

咁你同香港新移民傾偈嘅時候，你發覺佢哋而家移民嘅心態同你當時有咩分別呢？

我覺得佢哋大部份都唔捨得香港，好多都係有高薪厚職，但係又覺得唔走唔得，係被迫離開， 嚟到域多利要從頭開始過。好多香港人之前都係有工人洗，嚟到呢度就乜都要自己落手落腳做。呢度嘅生活節奏同文化又有好大嘅差異同佢哋想像嘅移民生活有好大嘅落差。

有啲咩期望落差, 或者文化上嘅差異呢？

1 搵文職 好多時候搵工想搵返文職，但係呢度好多文職都需要加拿大嘅工作經驗先至會請, 一落地嘅人冇呢方面嘅工作經驗, 好難搵到白領工作, 同埋其實依家域多利最需要人手嘅係一啲藍領工作, 特別係依家移民法案放寬咗, 你做夠1600個鐘就可以攞到Permanent residency, 所以其實只要捱夠一年做啲辛苦啲嘅工作，累積加拿大工作經驗, 咁好快就會搵到舒服啲嘅工.

2 識英文好叻咩? 識英文喺香港係優勢，喺哩度係基本，根本兩個唔同地方。點解香港嚟嘅覺得自己識英文就唔應該做粗重工作？本地人都識英文，菲律賓人都識英文。 識英文嘅香港人比本地人識多一種語言，就算入麥記或者超市由低做起，同冇經驗嘅本地人比已經有著數，加埋香港出名嘅效率同工作態度，你係老闆會搵邊個？然後捱一年做夠鐘就可以申請PR，然後可以用本地人學費讀個diploma 轉跑道。

3 佢係咪歧視我？ 有時因為語言上嘅不同，佢哋好容易覺得當地人歧視佢，有一啲好少嘅細節，例如當地人話 「佢係喺香港嚟嘅同我哋唔同」新移民就好容易將之解釋為: 「你歧視我你唔接受我我唔鍾意你」 但係其實當地人只不過係指出呢一個唔同, 並冇話接受定係唔接受, 唔同亦都係事實，我哋唔需要隱瞞只需要溝通了解，然後擁抱我哋嘅唔同。

4 已讀遲回 香港人慣咗好緊湊嘅生活，有時當地人回佢哋message/email會慢啲，甚至要幾日，佢哋就會覺得唔關心佢，唔想同佢講嘢想疏遠佢，又會諗好多嘢自我否定，令到自己精神緊張。但係因為呢度嘅文化時差問題，我哋樣樣嘢都係要諗吓度下慢慢咁做，所以有時諗清楚遲啲先覆你都係好正常。

呢幾年香港同埋世界發生咗咁多嘢，你有冇嘢想同初嚟步到嘅同路人講？

過到嚟多咗好多空間，唔洗俾以前個社會壓力框住，希望新到嘅唔好繼續綁住自己。嘗試去接受擁抱移民地嘅生活模式。以香港嘅一套生活思維去批評移民後嘅生活只係作繭自縛，令自己愈來愈唔開心。要有心理準備可能頭嗰兩三年會捱得辛苦啲，但係累積咗加拿大工作經驗之後，就會開拓更加多嘅機會，生活會越嚟越好。

小編的話

一個人流落異鄉，生活壓力同埋安全感不足，會令到自己諗好多嘢，但係只需要心態上作出適當嘅調整，凡事盡量向好嗰方面諗，喺海外生活雖然同香港好唔同但真係冇想像中咁複雜，人際關係亦都簡單好多，有好多人善意嘅意見或者付出，唔需要諗太多佢背後嘅動機，只需要懷着感恩嘅心快樂接受就可以。到你有能力嘅時候唔好忘本，付出貢獻返比個社群，令善良生生不息咁延續落去，就已經好好啦～ 加油呀～香港人！

睇埋其他呢位地膽寫嘅文章： 溫哥華唔喺溫哥華島上面 春夏秋冬 家居日常 醫療同個人入息稅 Pho U - 韓國人做嘅越南/韓國餐